Сигелгән Рәсәй картаһы

Чебоксар ҡалаһында “Сигелгән Рәсәй” Бөтә Рәсәй фестивале үтте. Унда илдең 70 төбәгенән ҡул эштәре оҫталары, этнографтар, рәссамдар тыуған яҡтарының ҡулдан сигелгән карталарын күрһәтте. Башҡортостан картаһы менән уның барлыҡҡа килеүенә айырыуса өлөш индергән милли кейем оҫтаһы, “Тамға” конкурстарының лауреаты Ғәбиҙә Вәлиева һәм республика проектының кураторы, Халыҡ ижады үҙәгенең төбәк-ара һәм халыҡ-ара хеҙмәттәшлек бүлеге мөдире Зарина Хәсәнова таныштырҙы. Фестивалдән Башҡортостан вәкилдәре Рәсәй Сыуаштар ассоциацияһының Рәхмәт хаты менән бүләкләнде. “Башҡортостандың сигелгән картаһы” проекты Мәҙәниәт министрлығы, Республика халыҡ ижады үҙәге, республика райондары һәм ҡул эштәре оҫталары тарафынан республика Башлығы грантына тормошҡа ашырылғайны. 1,5х2 үлсәмле туҡымаға эшләнгән картала тыуған төйәгебеҙҙең 54 районы һынландырылған, уларҙың сиктәре ике рәткә ҡайып (тамбурлап) сигелгән. Башҡортостан төбәктәрен 28 оҫтабикә сиккән, иң күбен – 26 райондың һүрәтен бер оҫта – Ғәбиҙә апай Вәлиеваның ҡулдары тыуҙырған. Карта кейеҙ һәм күнгә алтын, көмөш ептәр, таҫма, сәйлән һәм ярым ҡиммәтле таштар ярҙамында “төшөрөлгән”. Туҡымала һәр районды уның тап үҙенә хас биҙәктәре, символдары, танылып торған тарихи, географик йә башҡа объекттары аша танып була. Башҡортостандың сигелгән картаһы быйыл Өфөлә үткәрелгән беренсе халыҡ-ара Китап байрамында тәүгә күрһәтелде. Чебоксарҙағы фестивалдә Ғәбиҙә Ғибаҙулла ҡыҙы ҡайып сигеү (тамбур) буйынса оҫталыҡ дәресе лә үткәргән. Оҫтабикәнән был ҡатмарлы, айырым таһыллыҡ талап иткән кәсепкә өйрәнергә килеүселәр бихисап булған. – Ошондай күләмле сарала ҡатнашыу форсаты биргәндәре өсөн Республика халыҡ ижады үҙәгенә, проектыбыҙ кураторы Зарина Зыя ҡыҙына рәхмәтем ҙур. Чебоксарҙа оло илебеҙҙең 70 төбәгенән йыйылған сигеү оҫталары менән таныштым, тәжрибә уртаҡлаштыҡ, аралаштыҡ. Шул ҡәҙәре рухи байып, тәьҫораттарға күмелеп ҡайттым, – ти Ғәбиҙә апай. Фотоларҙа Башҡортостан картаһы янында – Зарина Хәсәнова һәм Ғәбиҙә Вәлиева; Ғәбиҙә апай Питер һәм Мәскәү ҡунаҡтары менән; фестивалдә ҡатнашыусыларҙан бер төркөм; Ғ.Вәлиеваның оҫталыҡ дәресенән күренештәр. Фотолар – Ғ.Вәлиева, РХИҮ.