25-27 августа Санкт-Петербургтың Һарай майҙаны башҡорт мәҙәниәте үҙәгенә әүереләсәк, төньяҡ баш ҡала халҡы һәм ҡунаҡтары Башҡортостандың үҙенсәлекле традициялары менән таныша аласаҡ. Республиканың сәнғәт оҫталары һәм музыкаль коллективтары сығышының хэдлайнеры булараҡ Рәсәйҙең һәм Башҡортостандың халыҡ артисы Николай Басков сығыш яһаясаҡ, сағыу концерт программаһы менән шатландырасаҡ. Башҡортостан Республикаһы көндәре сиктәрендә шулай уҡ төбәктең иҡтисади, инвестиция, туристик һәм мәҙәни ҡеүәте менән таныштырыу, башҡорт продукцияһы йәрминкәһен ойоштороу, гастрономия фестивале күҙалланған. Санкт-Петербургта йәшәүселәрҙе һәм ҡала ҡунаҡтарын башҡорт мәҙәниәте, тарихы һәм фольклорының бай мираҫын сағылдырған ҙур мәҙәни программа көтә. Аныҡлабыраҡ әйткәндә, 25-27 августа теләгән һәр кем республика тауарҙары йәрминкәһендә һәм «Гусь һәм бал» фестивалендә башҡорт халҡының мәҙәниәте, һөнәрҙәре, традицион аш-һыуы менән таныша аласаҡ. Сара Йырсылар үткеле урамында (Певческий проезд) иртәнге сәғәт 11-ҙән киске 9-ға тиклем дауам итәсәк. Рәсәй дәүләт Арктика һәм Антарктика музейында көн һайын, көндөҙгө сәғәт 12-нән киске 8-гә тиклем, В.И. Альбанов исемендәге полярниктар музейының «Башҡортостан моряктары Ватанға хеҙмәт иткәндә!» экспозицияһы эшләйәсәк. Күргәҙмәлә Башҡортостанда тыуып үҫкән Сергей Александрович Яновичҡа арналған әйберҙәр, шулай уҡ республиканың Диңгеҙселәр йыйылышы тарихына арналған экспонаттар, шул иҫәптән һыу аҫты кәмәләре макеттары тәҡдим ителәсәк. Көн һайын 11-ҙән киске 10-ға тиклем Академияның Капелла биләмәһендә «Күсмә халыҡтар иле - легендалар төбәге» башҡорт этноихатаһы йәйелдереләсәк, унда башҡорттарҙың үҙенсәлекле мәҙәниәте күрһәтеләсәк. Санкт-Петербург халҡы һәм ҡала ҡунаҡтары өсөн башҡорт тирмәһендә булыу, биҙәү-ҡулланма сәнғәте оҫталарының изделиелары менән танышыу, кейеҙ баҫыу, туҡыусылыҡ, ағас һырлау, башҡорт биҙәүестәрен эшләү, сүкеп биҙәү, милли уйын ҡоралдарында уйнау, ҡурай һәм ҡумыҙ яһау буйынса оҫталыҡ дәрестәрендә ҡатнашыу, шулай уҡ «Тамға» халыҡ-ара башҡорт милли кейеме оҫталарының иң яҡшы эштәрен ҡарау мөмкинлеге буласаҡ. Был саралар өлкәндәргә һәм балаларға иҫәпләнгән. Башҡортостандың Милли музейы Дәүләт Академия Капеллаһында «Евразия йөрәгендә. Башҡорттар», «Башҡорт аты тарихы» махсуслаштырылған күргәҙмәһен тәҡдим итәсәк. Төньяҡ баш ҡалала йәшәүселәр башҡорттарҙың күсмә торлағын күрәсәк, ысын халыҡ ижады ҡомартҡыһы - милли кейемде кейеп ҡарай аласаҡ, тамбурлы сигеү, биҙәкле туҡыусылыҡ, балаҫ һуғыу, ағас һырлау, музыка ҡоралдары эшләү сәнғәтенең серҙәрен беләсәк. Мәҙәни программа сиктәрендә балалар биләмәһе лә эшләйәсәк. Иң йәш тамашасылар милли уйындарҙа ҡатнашасаҡ, интерактив уйындарҙа көс һынаясаҡ, Башҡорт дәүләт ҡурсаҡ театрының «Ҡыр ҡаҙҙары - аҡҡоштар», «Муха - цокотуха», «Таш ҡунаҡ» кеүек иң сағыу спектаклдәрен ҡарай аласаҡ. 26 августа көндөҙгө сәғәт 12-нән киске 10-ға тиклем Һарай майҙанында «Башҡортостан дуҫтарын йыя» республика сәнғәт оҫталарының байрам концерты буласаҡ. Милли симфоник оркестр, Милли халыҡ уйын ҡоралдары оркестры, Х.Әхмәтов исемендәге Башҡорт дәүләт филармонияһының Эстрада-джаз һәм тынлы оркестры, «Йатаған», «Хазина» һәм «Зәйнетдин» этнопроекттары, Ф. Ғәскәров исемендәге дәүләт академия халыҡ бейеүҙәре ансамбле, шулай уҡ Наҙгөл Отузова, Динә Хөсәйенова, Әлим Ҡәйүмов, Гөлшат Ғирфанова, Иҙел Аралбаев, Дилара Иҙрисова, Зилиә Бәхтиева, Марат Татурас Санкт-Петербургта йәшәүселәрҙе үҙҙәренең ижады менән һөйөндөрәсәк. Рәсәйҙең атҡаҙанған, Башҡортостандың халыҡ артистары Асҡар һәм Илдар Абдразаҡовтар, Рәсәйҙең һәм Башҡортостандың халыҡ артисы Николай Басков концерттың махсус ҡунаҡтары буласаҡ. Башҡортостан Республикаһы көндәренең мәҙәни программаһы сиктәрендә Санкт-Петербургта Дәүләт Академия Капеллаһында башҡорт фильмдары презентацияһы үтәсәк. Өс көн дауамында байрам ҡунаҡтары режиссерҙар Рим Шәрәфетдинов, Айгөл Байрамғолова һәм Елена Юшкованың «Алдар һәм һоро бүре», «Урал тауҙары нисек барлыҡҡа килгән», «Хәйерлегә булһын», «Аңра бүре», «Урал менән Шүлгәндең мажаралары», «Аҡсура ауылы», «Һунарсы Юлдыбай» анимация проекттарын, Айнур Асҡаровтың «Өфөнән һөйөү менән», “Өс таған отряды” (М. Кәрим буйынса) һәм Булат Йосоповтың «Шағир көндәлеге» тулы метражлы фильмдарын ҡарай аласаҡ. Фото: spbdnevnik.ru