Солоҡ балын етештереү арта

2030 йылға Башҡортостанда солоҡ балын етештереү күләмен биш тапҡырға арттырыу планлаштырыла. 21 августа республика Башлығы Радий Хәбиров үткәргән оператив кәңәшмәлә ошо хаҡта һүҙ барҙы. Вице-премьер – ауыл хужалығы министры Илшат Фәзрахманов 2023 йылдың башына Башҡортостанда 1,6 мең самаһы солоҡ бал ҡорто күсе иҫәпләнеүен хәбәр итте. Был республикалағы бал ҡорто ғаиләләренең 0,5 проценты. Йылына улар 6,2 тонна самаһы бал етештерә. – Солоҡсолоҡ йолаларын һаҡлау, башҡорт бал ҡорто популяцияһын арттырыу, шулай уҡ туристик маршруттар булдырыу маҡсатында быйыл солоҡ-түмәр умартасылығына ярҙам итеү программаһы эшләй башланы, – тине Илшат Фәзрахманов. – Умартасыларға дәүләт ярҙамы саралары 2030 йылға солоҡ ҡорттары ғаиләләренең һанын өс тапҡырға – 5 меңгә, ә балды етештереүҙе биш тапҡырға – йылына 30 тоннаға тиклем арттырырға мөмкинлек бирәсәк. Программаны тормошҡа ашырыуға 2023 йылда төбәк бюджетынан 20 миллион һум аҡса йүнәлтелгән. Был аҡсалар бал ҡорто ғаиләләре, түмәрҙәр һәм техника һатып алыуға сығымдарҙың 50 процентына тиклемен ҡаплауға, шулай уҡ балды лаборатор тикшереүҙәргә тотоноласаҡ. – Программала ҡатнашырға 43 умартасы теләк белдерҙе. 2023 йылдың июлендә субсидиялар алыуға ғаризалар һайлап алынды, уның йомғаҡтары буйынса туғыҙ умартасы ярҙам алды ла инде. Улар 730 түмәр, 340 бал ҡорто пакетын һатып алған һәм 26 тапҡыр балды лабораторияла тикшергән, – тине Илшат Фәзрахманов. – Солоҡсолар республика етәкселегенә яңы программа өсөн рәхмәт белдерә һәм ярҙам алыу механизмын ябайлаштырыуҙы һорай. Ошо йәһәттән эшләйәсәкбеҙ. Йыл аҙағына тиклем Башҡортостандың Ауыл хужалығы министрлығы ҡалған күләмдәге субсидия алыусыларҙы билдәләйәсәк. Төбәк етәксеһе программаның төп йүнәлештәренә туҡталды. – Беҙ солоҡ умартасылығын кустарь умартасылыҡтан үҙгәртеү, асылда, цивилизациялы йүнәлешкә йөҙ бороу һәм башҡорт бал ҡорто популяцияһын һаҡлау бурысын ҡуйҙыҡ, – тине Радий Хәбиров. Фото: Башҡортостан Башлығы сайты.