Бөгөн Башҡортостан Башлығы Радий Хәбиров уҙғарған оператив кәңәшмәлә 2023 йылдың беренсе ярты йыллығы йомғаҡтары буйынса хеҙмәт баҙарындағы хәлде тикшерҙеләр. Республиканың ғаилә, хеҙмәт һәм халыҡты социаль яҡлау министры вазифаһын башҡарыусы Юрий Мельников хәбәр итеүенсә, Башҡортостанда эшһеҙлек кимәле 1991 йылдан иң түбән күрһәткескә тиклем кәмегән һәм 2,3 процент тәшкил иткән. Был Рәсәй буйынса уртаса күрһәткестән түбәнерәк (3,2 процент). 2023 йылдың 1 авгусына рәсми теркәлгән эшһеҙҙәр һаны артабанғы кәмеү тенденцияһы менән 13,8 мең кеше тәшкил итә. – Бында эш биреүселәр тәҡдим иткән эшкә урынлашыу варианттары арта. Әгәр йыл башына республиканың вакансиялар банкында 42,5 мең буш эш урыны булһа, бөгөн иһә уларҙың һаны 9 меңгә артҡан, – тине Юрий Мельников. Министр вазифаһын башҡарыусы һүҙҙәренсә, халыҡ мәшғүллеген тәьмин итеү өсөн төбәктә өҫтәмә дәүләт ярҙамы саралары комплексы ғәмәлгә ашырыла. Улар иҫәбендә – хеҙмәткәрҙәрҙе ваҡытлыса эшкә урынлаштырыу, йәмәғәт эштәрен ойоштороу һәм персоналды уҡытыу, шул иҫәптән оборона-сәнәғәт комплексы предприятиелары өсөн дә. Юрий Мельников республиканың федераль дәртләндереү программаларында ҡатнашыуы, шул иҫәптән “субсидиялаусы найм”, хаҡында ла һөйләне. Һүҙ 30 йәшкә тиклемге хеҙмәткәрҙең эшкә урынлашыуының 3-сө, 6-сы, 9-сы һәм 12-се айҙарында эш биреүсегә сығымдарҙың бер өлөшөн компенсациялау хаҡында бара. 2023 йылда бер кешегә субсидия күләме бер айҙа 24,3 мең һум тәшкил итә. Был программа буйынса “Берләшкән двигателдәр эшләү корпорацияһы - Өфө моторҙар эшләү производство берекмәһе” предприятиеһына 29 кеше эшкә урынлашҡан да инде. Ә йыл башынан алып 560 эш биреүсе 2 меңдән ашыу йәш кешене ҡабул иткән. Юрий Мельников хеҙмәт баҙарының хеҙмәт дефициты билдәләрен алыуы тураһында әйтте. Шуның менән бәйле Хеҙмәт һәм халыҡты социаль яҡлау министрлығы белгестәре төбәк Һанлы үҫеш министрлығы менән берлектә мониторинг һәм кадрҙарға ихтыяжды күҙаллау системаһын әҙерләй башланы. Ул республика эш биреүселәренә анкета тултырыуҙы күҙ уңында тота. Башҡортостан Башлығы муниципалитет етәкселегенә предприятиелар һәм ойошмалар менән һорау алыу үтеү кәрәклеге тураһында мәғлүмәт-аңлатыу эшенә ҡушылырға ҡушты. – Хеҙмәт ресурстарының етмәүе төп мәсьәлә булып тора. Ҡайһы бер производстволарҙа өҫтәмә рәүештә 200-ҙән алып 2000-гә тиклем кеше кәрәк, – тине Радий Хәбиров. – Ә яңы мониторинг системаһы хәлде аңларға һәм тейешле саралар уҙғарырға ярҙам итәсәк. Фото: Башҡортостан Башлығы сайты.