Хөкүмәттең был аҙналағы кәңәшмәһе күңелле ваҡиға менән башланды. Башҡортостан Башлығы Радий Хәбиров Хөкүмәтебеҙҙең элекке Премьер-министры Рафаэль Байдәүләтовты 80 йәшлек юбилейы менән ҡотланы һәм күп йыллыҡ хеҙмәте өсөн Халыҡтар дуҫлығы ордены менән бүләкләне. Республика Башлығы дәүләт эшмәкәренең Башҡортостан үҫешенә индергән тос өлөшөн билдәләне: – 16 августа күренекле дәүләт, сәйәси эшмәкәр, 1999-2008 йылдарҙа Башҡортостан Республикаһы Хөкүмәте Премьер-министры булып эшләгән Рафаэль Ибраһим улы Байдәүләтовҡа 80 йәш тулды, – тине Радий Хәбиров. – Беҙ Рафаэль Ибраһим улын күптән беләбеҙ, Хөкүмәттә уның уҡыусылары күп. Һеҙҙең эш осоро республика өсөн бик һөҙөмтәле һәм файҙалы булды. Хөрмәтле Рафаэль Ибраһим улы, Һеҙҙең бөтә наградаларығыҙ бар, хөрмәт йөҙөнән һеҙҙе Халыҡтар дуҫлығы ордены менән бүләкләргә булдыҡ. Тәбрикләү барышында бөтә зал аяҡ өҫтө тороп ҡул сапты. Рафаэль Байдәүләтов юғары награда һәм хеҙмәтен баһалағандар өсөн рәхмәт әйтте. Ҡыҙғанысҡа ҡаршы, кәңәшмә ваҡытында күңелһеҙ ваҡиғалар ҙа була. Был юлы Радий Хәбиров “Салауат Юлаев” командаһы хоккейсыһы Родион Әмировтың яҡындарының ҡайғыһын уртаҡлашты. “Бөгөн иртән республиканың һәм Рәсәйҙең спорт донъяһы Родион Әмиров менән бәхилләште. Егеткә 21 йәш, йыл ярым дауамында яман шеш менән көрәште. Заманыбыҙҙың бөйөк спортсыһына әйләнеп килә ине. Ҡыҙғанысҡа ҡаршы, егетте юғалттыҡ. Родион Әмировтың туғандарының һәм яҡындарының ауыр ҡайғыһын уртаҡлашам”, – тине Радий Хәбиров. Республика етәксеһе был ялдарҙа Стәрлетамаҡта барған “Купец 2.0” ҡунаҡсыллыҡ фестивален ойоштороу кимәлен юғары баһаланы һәм республикала үткәрелгән иң яҡшы сараларҙың береһе тине. Шул уҡ ваҡытта етәксе республиканың Эшҡыуарлыҡ һәм туризм министрлығын тәнҡитләне. Улар “Башҡортостанда оҙон ғүмер” программаһында ҡатнашҡан пенсионерҙарҙы байрамға килтереүҙе тәьмин итмәгән. – “Башҡортостанда оҙон ғүмер” программаһының маҡсаты – пенсионерҙарға республиканың матур урындарын, ҡыҙыҡлы ваҡиғаларҙы күрһәтеү. Улар байрамдарға, фестивалдәргә килә, унда сувенирҙар, тауарҙар ала, ҡала буйлап йөрөй алырға, концерттар ҡарарға тейеш. Бының өсөн беҙ бюджет аҡсаһын тотонабыҙ. “Купец 2.0” бик сағыу сара, унда туристарҙы килтермәү ҙур хата булды, – тине ул. Һаулыҡ һаҡлау министрының беренсе урынбаҫары Гөлнара Зиннурова коронавирус буйынса һуңғы мәғлүмәттәр тураһында әйтте. Уҙған тәүлектә сир 17 кешелә табылған. Әлеге ваҡытта 55 кеше вирус менән дауаханала көрәшә, 344 кеше өйөндә дауалана. Йоғошло ауырыуҙар госпиталдәрендә улар өсөн 75 урын әҙерләнгән, уларҙың 26,7 проценты биләнмәгән. Мәҙәниәт министры Әминә Шафиҡова был аҙна аҙағында Өфөлә үтәсәк “Геройҙар ваҡыты” патриотик йыр конкурсы тураһында һөйләне. Был сара Рәсәй Геройы, легендар Башҡорт кавалерия дивизияһы командиры Миңлеғәле Шайморавтовтың тыуған көнөнә арнала. – Икенсе йыл рәттән “Геройҙар ваҡыты” конкурсын үткәрәбеҙ. Быйыл ул 15 июндән 15 авгусҡа тиклем барҙы. Конкурсҡа өс номинация буйынса Рәсәйҙең 22 төбәгенән 403 ғариза килде,– тине Әминә Шафиҡова. – Финалға Рәсәйҙең 17 төбәгенән 58 композиция үтте. Беҙ бөтә өфөләрҙе һәм ҡала ҡунаҡтарын конкурс финалына саҡырабыҙ, ә 27 августа барыһын да гала-концертҡа саҡырабыҙ. Транспорт һәм юл хужалығы министры Александр Клебанов күңелһеҙ һандар менән таныштырҙы. Уҙған аҙнала республика юлдарында 18 кешенең ғүмере өҙөлгән. 13 кеше автомобилдәр бәрелеше, өс кеше – юлдан ҡолау һөҙөмтәһендә һәм бер йәйәүле тапалып үлгән. Дөйөм алғанда 80 авария теркәлгән, 348 водитель иҫерек килеш тотолған (бишәүһе авария ойошторған). Кәңәшмә барышында ураҡ барышы тураһында һүҙ булды. Вице-премьер Илшат Фәзрахманов әйтеүенсә, ауыл хужалығы эшсәндәре баҫыуҙарҙың яртыһын йыйып алған, былтырғы уңыш күләмдәре булмаһа ла, зарланырлыҡ түгел. Шулай уҡ ул республикала түмәр-солоҡ умартасылығын үҫтереү программаһы буйынса субсидияларҙы үҙләштереү мәсьәләһенә доклад менән сығыш яһаны. Республиканың торлаҡ-коммуналь хужалыҡ министры вазифаһын ваҡытлыса башҡарыусы Ирина Голованова төҙөкләндереү программалары тураһында һөйләне. Бында күп фатирлы йорттарҙа подъездарҙы комплекслы ремонтлау, ихата һәм йәмәғәт биләмәләрен төҙөкләндереү ингән, эштәр планға ярашлы бара. Ғаилә, хеҙмәт һәм халыҡты социаль яҡлау министры урынбаҫары Юрий Мельников хеҙмәт баҙарындағы хәлдәр менән таныштырҙы. Фото: "Башинформ".