Виртуаль ысынбарлыҡ һәм робот техникаһы – заман талабы

Робот техникаһы һәм виртуаль ысынбарлыҡ бөгөн бөтә тармаҡтарҙа ла ихтыяж менән файҙалана. Тәү сиратта, сәнәғәттә, сөнки ул яңы белем кимәленә һәм мөмкинлектәргә юлдар аса. ӨДНТУ-ла был йүнәлештәрҙе үҫтереү буйынса программалар тәүге йыл ғына ғәмәлгә ашырылмай, киләсәктә яғыулыҡ энергетикаһында һәм башҡа тармаҡтарҙа ошл технологиялар файҙаланылһын өсөн лаборатория һынауҙары, форумдар һәм дискуссиялар үткәрелә. Виртуаль ысынбарлыҡтың сиселештәрен әҙерләү һәм мобиль автономлы һәм пилотлы роботтарҙы конструкциялау хәҙер вуз-ара кампуста үткәреләсәк, ул «Өҫтөнлөк 2030» программаһының «Яңы йәшәү мөхите» стратегик проектына ярашлы Өфө үҙәгендә төҙөлә. Өфө дәүләт нефть техник университетының Евразия политехник мәктәбенең ике лабораторияһы – виртуаль ысынбарлыҡ һәм робот техникаһы - Евразия ғилми-белем биреү үҙәгенең һәм университеттың индустриаль партнер компаниялары өсөн VR-технологиялар булдырыу, сәнәғәт роботлаштырылған манипуляторҙарҙы программалау, робот техникаһы өлкәһендә ғәмәли тикшеренеүҙәр үткәреү һәм уларҙы көндәлек тормошта ҡулланыу менән шөғөлләнәсәк. Тикшеренеүҙәр һөҙөмтәһендә эксплуатациялау, ремонтлау, диагностикалау, технологик процестарҙы һәм ҡорамалдарҙы көйләү буйынса VR-тренажер барлыҡҡа киләсәк. Лабораторияларҙың эше ил һәм төбәк сәнәғәте ихтыяжына көйләнәсәк. Денис Гулин, Өфө дәүләт нефть техник университетының робот техникаһы һәм VR-технологиялар лабораториялары етәксеһе: - Яңы технологиялар уйлап табыу һәм заманса сәнәғәт үҫешенә булышлыҡ итеү – лабораторияларҙың фәнни һәм ғәмәли эшенең төп маҡсаты. Виртуаль ысынбарлыҡ һәм робот техникаһы йүнәлештәре буйынса һанлы технологияларҙы комплекслы ғәмәлгә индереү Евразия ғилми-тикшеренеү үҙәге һәм университеттың тармаҡ партнерҙары өсөн генә түгел, кампус резиденттары өсөн дә, стартаптар өсөн дә, Башҡортостан Республикаһы иҡтисадының төрлө тармаҡтары өсөн дә көнүҙәк. Бөтә нәмә, әлбиттә, белем биреүҙән башлана - инженер мәҙәниәте өлкәһендә дөрөҫ ҡараш формалаштырырға, фәндең тәбиғи һәм теүәл өлкәләренә ҡыҙыҡһыныуҙы арттырырға, ғәмәли мәсьәләләрҙе хәл итеү юлдарын эҙләүҙә стандарт булмаған фекерләү зарур. Шуға күрә мәктәп һәм юғары уҡыу йорттарында робот техникаһын өйрәнгән һәләтле студенттар һәм өлкән класс уҡыусылары яңы лабораторияларҙа етди фәнни эш һәм инженер-техник ижад менән шөғөлләнеү мөмкинлеге аласаҡ. Лабораторияларҙың уҡытыу, практик һәм проект эше партнер компаниялар хеҙмәткәрҙәре һәм белгестәре өсөн өҫтәмә һөнәри белем биреү программаларының нигеҙе буласаҡ. Иҫегеҙгә төшөрәбеҙ, вуз-ара кампус «Фән һәм университеттар» милли проектына ярашлы дәүләт-шәхси партнерлыҡ механизмдарын һәм концессия килешеүҙәрен файҙаланып, инновацион белем биреү мөхитен булдырыу буйынса федераль программа сиктәрендә төҙөлә. Фото һәм сығанаҡ: pravitelstvorb.ru