Мәләүез ҡалаһының мәҙәниәт һарайына район һәм ҡала ҡатын-ҡыҙҙары «Ҡатын-ҡыҙҙар бәхете биләмәһе» асыҡ академияһына йыйылды. Лекция өлөшөндә ҡатын-ҡыҙҙар һаулығы, ғаиләләге үҙ-ара мөнәсәбәттәр, балалар тәрбиәләү, бизнес алып барыу тураһында көнүҙәк темалар күтәрелде. Шуныһы мөһим, зал тыңлаусылар менән шығырым тулы булды, сығыштан һуң спикерҙар оҙаҡ ваҡыт халыҡ менән аралашты, уларҙы борсоған һорауҙарға яуап бирҙе. Сарала ҡатнашыусылар өсөн мауыҡтырғыс оҫталыҡ дәрестәре, психологтар һәм «Ғаилә» үҙәге белгестәре менән дәрестәр үтте. Ҡатын-ҡыҙҙар файҙалы белем алыуҙан тыш, матурлыҡ салондары оҫталарынан консультация алып, ваҡыт үтеүен һиҙмәне. Бар ерҙә илһам, шатлыҡ, еңеллек атмосфераһы хөкөм һөрҙө. "Ҡатын-ҡыҙ бәхет биләмәһе”ндә алдан яҙылыу буйынса республиканың алдынғы белгестәре: гинеколог-репродуктолог, пульмонолог, ревматолог, кардиолог, гематолог, аллерголог, психолог бушлай консультациялар үткәрҙе. Балалар өсөн эндокринолог, невролог, аллерголог ,ортопед кабинеты эшләне. Баш ҡала табиптары бөтәһе 252 консультация үткәрергә өлгөрҙө. «Ярҙам күрһәтеү биләмәһе»ндә Республиканың Ғаилә, хеҙмәт һәм халыҡты социаль яҡлау министрының беренсе урынбаҫары Ольга Кабанова, БР Һаулыҡ һаҡлау министрлығының штаттан тыш педиатры, Республика балалар клиник дауаханаһының баш врачы Людмила Семавина, БР Мәғариф һәм фән министрлығының өҫтәмә белем һәм тәрбиә биреү бүлеге начальнигы Лира Тереғолова, «Ватан һаҡсылары» дәүләт фонды вәкилдәре финанс, социаль һәм юридик ярҙамға ҡағылышлы һорауҙарға яуап алырға ярҙам итте. Бында шулай уҡ махсус хәрби операцияла ҡатнашыусыларҙың ғаиләләренә ярҙам күрһәтеү саралары менән танышырға мөмкин ине. Брифинг һуңында БР Милли банк бүлегенең әйҙәүсе экономисы Анна Каменева һәм экономика бүлеге начальнигы урынбаҫары Рәсимә Ваисова финанс грамоталыҡ буйынса лекция үткәрҙе. Оло йәштәге ҡатын-ҡыҙҙар өсөн республика клиник психотератия үҙәгенең психология лабораторияһы мөдире Елена Карпова өлкән йәштәге кешеләрҙең проблемалары һәм уларҙы хәл итеү ысулдары хаҡында һөйләне. Клиника психологы, психоаналитик Юлия Хәкимованың «120-гә тиклем йәшәйбеҙ» тип исемләнгән лекцияһы ла ҡатнашыусыларҙа ҙур ҡыҙыҡһыныу уятты. Асыҡ академия авторы, «Бәхет территорияһы» хәйриә фондының попечителлек советы рәйесе Каринэ Хәбированың сәләмләүе байрамдың иң күңелле мәлдәренең береһе булды. «Мәләүез ҡалаһы тәбиғәте, унда йәшәгән кешеләр үҙҙәренең матурлығы менән менән һоҡландыра. Һеҙҙең яҡҡа килгәндәр ҡунаҡтан тик иң яҡшы хис-тойғо менән ҡайтасаҡ, сөнки һеҙ башҡарған эшегеҙгә барлыҡ күңелегеҙҙе һалаһығыҙ”, - тине ул. Сараға килгәндәр аралашып, кәңәш туплап, үҙҙәрен борсоған һорауҙарға яуап табып, “HAZINA” этно-проектының концертын ҡарап, бай тәьҫораттар менән таралышты.