Билдәле шағирә, тәржемәсе, журналист Тамара Юлдашева (Искәндәриә) баҡса үҫтереү серҙәре менән уртаҡлашты. Беренсе тарих “Был баҡсаға утыҙ йыл элек тәүге түтәл сәскәндә бында ҡола ялан ине. Хәҙер тотош бер ҙур ауыл. Иң тәүҙә Хисмәт ҡойо ҡаҙытты, ауылса, биҙрә менән һыу ала торған итеп. Үҙебеҙ генә түгел, бөтөн тирә - яҡ күршеләр рәхәтләнде был ҡоҙоҡтан (беҙҙә ҡойо тиҙәр). Ләкин һыу юлдары ҡайһы берҙә ҡапланамы икән ул, ҡойобоҙҙа бер заман һыу әҙәйгәндән - әҙәйә барып, тамам бөтөп ҡуйҙы. Бер тиҫтә йыллап булалыр элек, баҡса ҡарауҙы бөтөнләй тиерлек ташланыҡ... Уға тиклем биҙрә - биҙрә еләк, сейә, тоҡлап алма менән ҡыуандырған баҡсабыҙ, ни сәбәптәндер, ҡойобоҙҙан һыу китеү сәбәплеме, әллә үҙебеҙҙең иғтибарыбыҙға һыуһапмы, төҫһөҙләнеп ҡалғайны. Йорт төҙөү эштәрен башланыҡ. Ҡарайбыҙ – ҡойобоҙға һыу ҡайтты! Әлхәмдүлилләһ, көмөш кеүек саф тәмле һыу! Йортто матурлап һалып сығып, мунса йүнәтләп, ҡойобоҙҙо тағы ла тәрәнәйтеп алдыҡ. Баҡсабыҙҙа йәйге эҫенән ҡасып рәхәтләнеп йәшәп ятабыҙ. Телефон тотмай тиерлек, интернет юҡ — бына рәхәтлек! Ҡайһы берҙә, донъяны һағынып китһәк, унда ни хәлдәр бар икән, тип, өйҙән сығып интернет тотоп, ағас төбөндә ошолайтып яҙышып алам. Ҡыҙыҡ ҡына күҙәтеүҙәр яһайым. Был холоҡ тигәнең помидорҙың помидорында бар әй. Берәүҙәре буйға үҫеүҙе уйлап та бирмәй балалай ҙа балалай. Икенселәре ҡайҡайып буйға үҫә, "мин" дә "мин" тип ултыра, ул япраҡтарының матурлығы, иренеп кенә сәскә ата, емеше юҡ. Ә өсөнсөләре 9 майҙағы салют һымаҡ сәскә ата ла ата, нимә уйлайҙыр, ул тиклем йөҙләгән сәскәнән барыбер помидор сығара алмай бит инде был, тип, мин ҡарап көйәләнәм. Беҙ уларҙың хатта түтәлдәренә төрлө исемдәр бирҙек. Уртала ике ҙур түтәл - "Ударница" һәм "Трудовик" командалары социалистик ярышта ярышып үҫә. Ә бына шау сәскәлеләр - "Биҙәнсектәр", ә ситтәгеһе - "Важный скороспелка". Шулай ҙа һәр командала әлеге лә баяғы "мин-минлек" менән ауырыусы "Маҡтансыҡ"тар бар. Ни эшләйһең, донъя булғас, барыһы ла була. Икенсе тарих Себештәрҙе көҙөн һанайбыҙ, тигән кеүек, помидорҙарҙың да ҡәҙере көҙгәрәк беленә икән. Яҙғайным инде.. холоҡтары төрлө - төрлө, тип. Әйтәгүр, "Ударница" командаһы иң тәүҙә бешеп, һабағы бер ҡарыш булһа ла, унар - ун икешәр һәлмәк кенә томаттар биреп ҡыуандырҙы. Ә теге "биҙәнсектәр", шау сәскәгә күмелеп салют биреп ултырғандары, шулай виноград лозаһы һымаҡ ваҡ ҡына суҡ-суҡ помидоры менән һөйөндөрҙө. Иҫегеҙҙә булһа, арала йәнемде көйҙөргән "эре маҡтансыҡтар" ҙа бар ине. Улар әле килеп мине үҙҙәрен танырға һәм ихтирам менән ҡарарға мәжбүр итте әле ул! Эре йәшел емештәре үҫә биреп, торараҡ бешер, тип өмөтләнәм. Ҡыҫҡаһы, минең ошо командалар алдында ҡуйған бурыстарымды барыһы ла уңышлы башҡарып сыҡты, сыға, Аллаһы бойорһа. Һығымта: сәскә атҡан сағында түгел, емеш биргәс кенә нимәлер тураһында фекер әйтергә була”, - тип яҙҙы Тамара апай Юлдашева социаль селтәрҙәге сәхифәһендә һәм ҡыҙарып бешкән помидорҙарының фотолары менән дә уртаҡлашты. Баҡсағыҙҙың, үҫтергән уңышығыҙҙың мәнфәғәтен күреп, иҫәнлектә-һаулыҡта ашарға яҙһын! Сығанаҡ һәм фотолар: vk.com/tamarayuldash