Атырдьах ыйын 11-13 күннэригэр Үөһээ Бүлүү, Бүлүү, Ньурба, Нам уонна Таатта улуустарын 200-тэн тахса көхтөөх ыччата Түгэхтэй алааһыгар, улуу убайбыт Исиидэр Бараахап төрөөбүтэ 125 сыллаах үбүлүөйдээх тэрээһиннэрин чэрчитинэн ыытыллар «АКТИВВЕРВИЛ» эдэр ыччат бэстибээлигэр кыттыыны ылла.
Бастакы күн
Кыттааччылар тэрээһин устата Түгэхтэй алааһыгар аныгы тутуулаах балаҕаннарга үрдүттэн хоно сытан кытыннылар. Бэстибээл бастакы күнүгэр кыттааччылар уон хамаандаҕа арахсан күрэхтэрин саҕалаатылар. АКТИВВЕРВИЛ биир сүрүн уратыта - хамаандалар хапытааннарынан Үөһээ Бүлүү улууһун нэһилиэктэрин эдэр баһылыктара анаммыттара буолар. Хамаандалары араарыы улууһунан буолбакка эрэ булкаас буолбутун кыттааччылар астына бэлиэтээтилэр. Маннык хамаандаларга ыччат бэйэ-бэйэтин кытта ордук билсэр диэн биһирээтилэр.
Бэстибээл үөрүүлээх арыллыытыгар Ил Дархан кэлэн ыччаты кытта көрүстэ. Аан Дархаммыт Михаил Ефимович Николаев эдэр ыччаты сайыннардахха, өйөөтөххө, үөрэттэххэ биирдэ Саха Сирэ сайдарын, инники күөҥҥэ буолар диэн өрүү киниэхэ этэрин санаан ааста. Эҕэрдэ тылларын эдэр ыччат миниистирэ Петр Шамаев, Үөһээ Бүлүү баһылыгын эбээһинэһин быстах кэмӊэ толорооччу Семен Михалев уонна Феодосия Габышева эттилэр. Арыллыыга хамаандалар парадтаан киирэннэр доҕордоһуу оһуокайыгар тутустулар, ол кэннэ хамаандалын билиһиннэрэр дьүһүйүүлэри көрдөрдүлэр.
Киэһээҥҥи бырагырааманы эдэр ыччакка киэҥник биллибит ырыаһыттар – биһиги биир дойдулаахтарбыт – Замир, Амор, Харысхан Мойтохонов, Тыыннаах, Маским Дмитриев, Милен уонна ыалдьыппыт Аман Анхаров уоттаах-күөстээх кэнсиэртэрэ киэргэттэ. Манна кыттааччылар эрэ буолбакка олохтоох нэһилиэнньэ эмиэ кэлэн ыччаты кытта биир тэтимҥэ буолла.
Иккис күн
Бэстибээл иккис күнүгэр сарсыардааҥҥы халлаамыт ардахтаах буолан биэрдэ, ол гынан баран, эдэр ыччат онтон самнан турбакка, интириэстэринэн арахсан төгүрүк остуоллар тула муһуннулар.
Кэпсэтиилэр икки хайысханнан буолан аастылар: «Биһиги Саха сирин төрүттээччилэр сыдьааннарабыт» уонна «Саха сиригэр тыллары харайыы». Бу маннык төгүрүк остуолларга ыччат хайдах гынан төрөөбүт тылын сүтэрбэккэ, сахалыы тыынын туппутунан сайдыы суолун тобулуон сөбүн ыраҥалаан көрдө. Күн иккис аҥарыгар биэс хайысхаҕа арахсан площадкалар үлэлэрэ ыытылынна: «Патриотика», «Политика», «Лидерство», «Предпринимательство», «Экономика». Хас биирдии площадкаҕа ананан кэлбит спикердэр кыттыыны ыллыллар, холобурдарын үллэһиннилэр. «Хас биирдии киһи бэйэтин сайыннара сатыахтаах. Бэйэтин сатаан сайыннарбыт эрэ киһи аныгы үйэҕэ, ханна баҕарар тиийдэҕинэ сатаан аахсар, сатаан быһаарсар уонна бэйэтин “Бу мин” диэнин сатаан илдьэ сылдьар киһи буолуоҕа» - диэн Феодосия Габышева санаатын үллэһиннэ. Бу маннык көрсүһүүлэр түмүктэрэ ыччакка саҥа саҕахтары арыйарга, чыпчааллары дабайарга көмө буолуохтара.
Киэһээӊӊи өттүгэр араас хайысхаларга: хомуска оонньууга, йогаҕа, туойунан, фарфорунан оҥоһукка, таӊаска уруһуйдуурга, о.д.а. маастар кылаастар буолан аастылар. Улууспут эдэр урбаанньыттара бэйэлэрэ оӊорбут бородууксуйаларын атыылаатылар, кыттааччыларга билиһиннэрдилэр. Маны тэҥэ, тэрилтэлэр салайааччылара кэлэннэр үлэһитэ суох аһаҕас турар дуоһунастары кэпсээтилэр, эдэр дьону үлэҕэ ыӊырдылар.
Күн бүтүүтэ, тыыннаах музыка кэнсиэрдигэр Үөһээ Бүлүүттэн «Үргэл» бөлөх, Ньурбаттан «Амака» уонна Дьокуускай куоракка үөрэнэр устудьуоннарбыт «Uraan Band» бөлөхтөрө ыҥырыллан кэлэннэр бэстибээл киэһэтин ураты тыыннаатылар, эдэр ыччаты сэргэхситтилэр.
Үһүс күн
Бэстибээл үһүс күнэ сүрдээх долгутуулаахтык уонна тыҥааһыннаахтык ааста. Бу күн хамаандалар икки күн устата толкуйдаабыт бырайыактарын көмүскээтилэр. Биһиги улууспут баһылыга, Владимир Семенович Поскачин бырайыактары тус бэйэтинэн иһиттэ уонна дьүүллэстэ. Хас биирдии хамаанда сүрдээх таһымнаах уонна туһалаах бырайыактары толкуйдаан кэпсээбитэ киһини үөрдэр.
Киирбит этиилэртэн холобур аҕаллахха: Оскуола оҕолоругар Саха сирин историятын дириҥник үөрэтии, профориентация үлэтин күүһүрдүү, доруобуйаларын хааччахтаах дьону үлэннэн хааччыйыы, саха төрүт үгэстэрин сөргүтүү, саӊа мобильнай приложениелар, бэйэ оӊоһугун таһаарааччыларга «Арт Балаҕан» уо.д.а.
Вилюй Титов хапытааннаах «Кэскиллээх көлүөнэ» хамаанда Үөһээ Бүлүү - Дьокуускай хайысханан 1500 солкуобайга, о.э такси сыанатыттан икки төгүл чэпчэкигэ илдьэр социальнай автобустары улууспутугар киллэрии туһунан бэрт сэргэх бырайыагы көмүскээтэ.
Бэстибээл сабыллыытыгар Владимир Семенович Поскачин түмүгү биллэрдэ. Ол курдук, уопсай түмүгүнэн бастакы миэстэни “Күн ыччаттара” хамаанда ылла. Хоро нэһилиэгин эдэр баһылыга Альберт Александрович Иванов хапытааннаах хамаанда Кытай Хэйхэ куоратыгар күүлэйдии барар путевканнан наҕараадаланна. Иккис миэстэни Маҥаас эдэр баһылыга Николай Григорьевич Илларионов хапытааннаах “Вервишенки” хамаанда ылла уонна Өлүөнэ очуостарыгар сынньана барар чиэскэ тигистэ. Үһүс миэстэҕэ Үөдүгэй нэһилиэгин эдэр баһылыга Альберт Юрьевич Иванов хапытааннаах “Сайдыс” хамаанда таҕыста, кинилэр Дьокуускай куоракка «Высшая школа инновационного мененджмента при Главе РС (Я)» (ВШИМ) үөрэх киинигэр билиилэрин хаҥатан кэлиэхтэрэ.
Камила Михайлова
