Ҡыйғы районының Түбәнге Ҡыйғы ауылында "Торлаҡ һәм ҡала мөхите" милли проектының "Уңайлы ҡала мөхитен булдырыу" федераль проекты ярҙамында парк асылды. Төҙөлөш тамамланыуын өлкәндәр ҙә, балалар ҙа көтөп алған. Проект тормошҡа ашһын өсөн күп эштәр башҡарылған. Инициативалы төркөм һәм әүҙем ауыл халҡы биләмәне төҙөкләндереүгә ҙур өлөш индергән. Паркта резина япмалы хәүефһеҙ балалар һәм тренажер майҙансыҡтары, бәүелсәктәр, каруселдәр һәм уйын комплексы урынлашҡан. Бында заманса яҡтыртыу үткәрелгән. Парк тимер ҡойма менән кәртәләнгән. Йәшелләндереү йәһәтенән газон сәселгән, сәскәләр ултыртылған, йәйәүлеләр юлына эскәмйәләр һәм бәләкәй архитектура ҡоролмалары ҡуйылған. Яңы паркты асыу тантанаһына бөтә ауыл халҡы тиерлек килгән. Балалар шунда уҡ балалар майҙансығындағы яңы уйын комплекстары менән танышҡан, үҫмерҙәр спорт зонаһына киткән, өлкәндәр эскәмйәлә урын алған. Ҡыйғы халҡы яңы уңайлы ял итеү урынын лайыҡлы баһалаған. "Ауылды төҙөкләндереү эштәре кешеләргә тыуған ауылындағы йәмәғәт биләмәләрендә уңайлы йәшәһендәр, биләмәнән ситтә ял итеү урындары эҙләмәһен өсөн уҙғарыла", – тине Ҡыйғы районы хакимиәте башлығы Зөһрә Гордиенко. Билдәле булыуынса, “Торлаҡ һәм ҡала мөхите" (национальный проект “Жилье и городская среда”) милли проекты Рәсәй Президенты Владимир Путиндың май указы менән булдырылды. Фото: Ҡыйғы районы хакимиәте.