Фольклор менән ҡыҙыҡһынған тамашасылар йыйылған концерт залында төрлө халыҡтарҙың йырҙары һәм бейеүҙәре менән сығыш яһау – бер эш. Ә бына осраҡлы кешеләр күп булған ҡала паркында Башҡортостанда йәшәгән халыҡтарҙың милли мәҙәниәт байлығын һәм төрлөлөгөн күрһәтеү ҙур тырышлыҡ талап итә. Был бурысты “Туймазы-Фест” фестивале ҡатнашыусылары тулыһынса атҡарып сыҡты. Сара сиктәрендә мәҙәниәт хеҙмәткәрҙәре һәм райондың әүҙем халҡы башҡорт, рус, татар, сыуаш, мари милләттәренең этноихаталарын булдырҙы. Улар ҙур булмаған биләмәләрҙә теге йәки был милләткә хас булған биҙәкле туҡымаларҙы, өй һәм туҡыу кәрәк-ярағын һәм, әлбиттә, милли ризыҡтарҙан һығылып торған өҫтәлдәр әҙерләне. Ихаталарҙа йыр-бейеүҙәр, милли уйындар ойошторолдо. Дуҫлыҡ, Райман, Көйөктамаҡ ауылдары мәҙәниәт йорто хеҙмәткәрҙәре сағылдырған башҡорт ихатаһында гармун көйҙәре яңғыраны. Шулай уҡ Кәкребаш, Үрмәкәй, Илсембәт ауылдары әҙерләгән татар ихатаһында ла музыка ҡоралдары тауышы ишетелеп торҙо. Түбәнге Троицк һәм Серафимов ауылдары әҙерләгән рус ихатаһында ҡунаҡтар төрлө ярыштарҙа ҡатнашты, Иҫке Туймазы, Үрге Бишенде, Яңы Бишенде ауылдарының мари ихатаһында йыр-бейеүҙәр яңғырап торҙо. Туҡтағол, Татар-Олҡан, Бишҡурай ауылдары мәҙәниәт хеҙмәткәрҙәре күңелле сыуаш йыры менән халыҡтың күңелен асты. Этноихаталар урамын халыҡты элекке замандарға алып ҡайтҡан, төрлө көнкүреш әйберҙәре менән биҙәлгән фото зонаһы тамамланы. Бында һәр теләгән кеше фотоға төштө. Биләмәне Төмәнәк ауылы мәҙәниәт йорто әҙерләгән. Ихаталарҙан алыҫ түгел оҫталар йәрминкәһе урынлашты, унда урындағы ҡул эштәре оҫталары, рәссамдар һәм һөнәрселәр үҙҙәренең ижад емештәрен – сигеү, кейеҙ һуғыу, тире һәм ағас менән эшләү оҫталығын күрһәтте. Ә һуңынан төп сәхнәлә бейеү, вокал, фольклор коллективтарының сығышы ойошторолдо. Туймазы артистарынан тыш, ҡала халҡын һәм ҡунаҡтарҙы Шаран һәм Баҡалы райондарынан, Октябрьский ҡалаһынан ижади коллективтар таланттары менән ҡыуандырҙы. Район хакимиәте башлығы Айҙар Суфиянов күп милләтле республикала берҙәмлектә һәм үҙ-ара аңлашып йәшәүҙең мөһимлеге тураһында һөйләне. Туймазы районында ғына 60 милләт вәкиле йәшәй. Уларҙың дуҫлығына һәм берҙәмлегенә бер-береһенең милли мәҙәниәтен һәм йолаларын өйрәнеү булышлыҡ итә. Тап ошо маҡсатҡа өлгәшеү өсөн Туймазыла этнофестиваль үткәрелә. Хәтерегеҙгә төшөрәбеҙ, “Туймазы-Фест” тәүге тапҡыр 2019 йылда уҙғарылған. Шул ваҡыттан алып ул матур йолаға әүерелгән. Сараны район хакимиәтенең мәҙәниәт бүлеге, район башҡорттары ҡоролтайы, биләмә-ара клуб системаһы, “Родина” мәҙәниәт һарайы ойоштора. Фото: tuvest.ru