Башҡортостан Башлығы Радий Хәбиров сираттағы “Төҙөлөш сәғәте”н үткәрҙе. Унда видеобәйләнеш режимында Биләмәләрҙе үҫтереү федераль фонды вәкилдәре ҡатнашты. Көн тәртибендә өлөшсөләрҙең боҙолған хоҡуҡтарын тергеҙеү мәсьәләләре ҡаралды. 2023 йылдың август аҙағына ярашлы уларҙың төбәктәге дөйөм һаны 2,2 мең кеше тәшкил итә. Республиканың төҙөлөш һәм архитектура министры урынбаҫары Артем Ковшов хәбәр итеүенсә, проблемалы объекттарҙың берҙәм реестрында 31 күп фатирлы йорт бар. Өлөшсөләрҙең хоҡуҡтарын тергеҙеү бер нисә йүнәлеш буйынса бара. Мәҫәлән, 12 объект республика иҫәбенә төҙөлә. Унда 1,3 мең кеше фатир аласаҡ. Шулай уҡ республиканың Өлөшсөләр хоҡуғын яҡлау фонды федераль ярҙам иҫәбенә төҙөгән ике йорт тиҙҙән файҙаланыуға тапшырыласаҡ. Тағы ла 11 йорттоң милекселәре Биләмәләрҙе үҫтереү федераль фондынан аҡсалата компенсация аласаҡ. Ике йортто өлөшсөләр булмау сәбәпле проблемалы объекттар реестрынан сығарырға планлаштыралар. Ә ҡалған өс йорт буйынса Биләмәләрҙе үҫтереү федераль фондының Күҙәтеү советы 2023 йылдың өсөнсө кварталы аҙағына тиклем финанс бүлеү тураһында ҡарар ҡабул итәсәк. Фото: glavarb.ru