2022 йылда Башҡортостанда һуңғы 20 йылда алкоголь менән ағыуланыуҙан үлем осраҡтарының минималь кимәленә еткән. Был хаҡта Башҡортостан Башлығы Радий Хәбиров үткәргән аҙналыҡ оператив кәңәшмәлә төбәктең сауҙа һәм хеҙмәттәр министры Алексей Гусев хәбәр итте. Министр былтыр 52 кешенең ялған алкоголдән вафат булыуын билдәләне. Был һуңғы йылдарҙағы өс һанлы күрһәткестәрҙән бер нисә тапҡырға аҙыраҡ. Әйтәйек, 2018 йылда – 211, ә 2020 йылда 102 үлем осрағы теркәлгән. Алексей Гусев билдәләүенсә, үлем осраҡтарының кәмеүе – республиканың алкоголь баҙарын көйләү өлкәһендәге дөрөҫ сәйәсәт һөҙөмтәһе. Лицензияланған һатыу нөктәләренең үҫеше, контроль һәм иҫкәртеү эше легаль алкоголь өлөшөн арттырырға һәм баҙарҙан суррогат продукцияны ҡыҫырыҡлап сығарырға мөмкинлек бирҙе. Һөҙөмтәлә Волга буйы федераль округы төбәктәре араһында Башҡортостанда 100 мең кешегә алкоголь менән ағыуланыуҙан үлем кимәле иң түбәне булды. Башҡортостан Башлығы алкоголле продукцияның законһыҙ әйләнешен асыҡлау һәм бөтөрөү буйынса көстәрҙе кәметмәҫкә ҡушты. Шуға бәйле республика муниципалитеттары хоҡуҡ һаҡлау органдары менән берлектә тораҡ пункттар буйлап рейдтар ойошторорға планлаштыра. – Яңыраҡ күрше төбәктәрҙә хәмер менән ағыуланыу осраҡтары теркәлде. Шуға күрә беҙ тәүәккәллек менән баҫым яһарға тейеш. Был эш даими көс туплауҙы талап итә. Эште кәметеү менән легаль булмаған һатыусылар барлыҡҡа килә, – тине Радий Хәбиров. – Беҙ ауыл биләмәләре башлыҡтары менән осрашыуҙар үткәрҙек, унда ауылдарҙа суррогатҡа бәйле хәлде тикшерҙек. Бындай һатыусыларҙы тотасаҡбыҙ тип һөйләштек. Тиҙҙән махсус эш төркөмө ултырышында был өлөштә берлектәге эш планын билдәләйәсәкбеҙ. Фото: Башҡортостан Башлығы сайты.