Башҡортостан Хөкүмәте Премьер-министры Андрей Назаров етәкселегендәге республика Хөкүмәте ултырышында «Айыҡ ауыл» конкурсын үткәреү тәртибенә бәйле мәсьәләләр ҡаралды. Ағымдағы йылдың 1 сентябрендә старт аласаҡ конкурс барышында бер нисә үҙгәреш көтөлә. 2011 йылда Бөтә донъя башҡорттары ҡоролтайы башланғысы менән Башҡортостанда сәләмәт йәшәү рәүеше традицияларын һаҡлау һәм алкоголь ҡулланыуҙы кәметеү маҡсатында ойошторолған конкурсты үткәреү тәжрибәһе менән күрше төбәктәр генә түгел (Удмуртия, Татарстан, Свердловск, Ырымбур, Силәбе өлкәләре, Пермь крайы), шулай уҡ Бүрәт Республикаһы, Байкал аръяғы крайы һәм Яҡутстан да ҡыҙыҡһына, тип билдәләне Премьер-министр. - «Айыҡ Рәсәй» хәрәкәте билдәләгән «Төбәктәрҙең айыҡлыҡ рейтингы» йомғаҡтары буйынса, Башҡортостан 2022 йылда Волга буйы федераль округында лидер булды һәм дөйөм федераль рейтингта 22-нән 16-сы баҫҡысҡа күтәрелде. Республика Башлығы Радий Хәбиров башланғысы менән 2020 йылда «Айыҡ ауыл» конкурсының бүләк фонды 1,5 миллиондан 40 миллион һумға тиклем арттырылды, - тип билдәләне Андрей Назаров. Быйыл конкурстың приз фонды күләме һаҡлана, шул уҡ ваҡытта уны уҙғарыу тәртибендә үҙгәрештәр бар. Улар тураһында ултырышта Башҡортостан Республикаһының ғаилә, хеҙмәт һәм халыҡты социаль яҡлау министры Ленара Иванова хәбәр итте. Министр онлайн-тауыш биреү ваҡытында төп үҙгәрештәрҙең береһе сифатында бер тораҡ пункт өсөн бер тапҡыр ғына тауыш биреү мөмкинлеген билдәләне. Унан тыш, бынан алдағы конкурста призлы урындар яулаған ауылдар бәйгелә ҡабаттан ҡатнаша алмай. 2023 йылдың 1 авгусынан 2024 йылдың 30 апреленә тиклем ике этапта үтәсәк конкурстың саралар графигы ла үҙгәрә: I этап (муниципаль) - 2023 йылдың 1 авгусынан 30 ноябренә тиклем Башҡортостандың муниципаль райондарының тораҡ пункттары араһында үткәрелә; II этап (республика этабы) - 2023 йылдың 1 декабренән 2024 йылдың 30 апреленә тиклем муниципаль этапта еңеүсе ауылдар араһында үткәрелә. Министр билдәләүенсә, 3 октябрҙә Бөтә донъя башҡорттары ҡоролтайы Бөтә донъя айыҡлыҡ көнөнә арналған «Айыҡ ауыл: граждандар башланғыстары һәм социаль тәжрибәләр» фәнни-ғәмәли семинарын үткәрәсәк, ә социаль селтәрҙә материалдар баҫтырғанда ойоштороу комитеты ағзалары рәсми раҫлаған #Айыҡауыл2023, #Айыкауыл2023 хэштегтарын файҙаланырға тейеш. Шулай уҡ үҙ сығышында Ленара Иванова, йыл һайын конкурс сиктәрендә ауыл халҡына файҙа килтергән һәм уларҙың йәшәү сифатын күтәргән проекттар күбәйә бара, тине: аҡсалата приз иҫәбенә яңы ылығыу нөктәләре барлыҡҡа килә, балалар һәм спорт майҙансыҡтары ҡуйыла, урамдарҙың юл япмаһы ремонтлана, контейнер майҙансыҡтары төҙөлә, урамды яҡтыртыу системаһы монтажлана һәм башҡалар. Фекер алышыу йомғаҡтары буйынса Башҡортостандың Ғаилә һәм хеҙмәт министрлығы әҙерләгән «Айыҡ ауыл» республика конкурсын үткәреү тәртибенә үҙгәрештәр индереү тураһында ҡарар проекты хупланды. - Ҡарар проектын хупларға тәҡдим итәм. Ойоштороусыларҙан ауыл биләмәләренең конкурста күберәк ҡатнашыуын тәьмин итеүҙе, ә Матбуғат һәм киң мәғлүмәт саралары агентлығы киң мәғлүмәт компанияһын ойоштороуҙы һорайым, - тип йомғаҡланы Башҡортостан Республикаһы Хөкүмәте Премьер-министры Андрей Назаров. Фото: pravitelstvorb.ru