Батырлығын онотмайҙар

Яҙғы ташҡында йылға, урғылып ағып, оло йылғаға ҡойоп, даръялай ажғырып ятҡан ерҙә генә ете йәшлек малай һыуға ҡолай, ә уны ҡотҡарырға артынан һигеҙ йәшлек малай һикерә... Был ваҡиғаны һөйләгәндә Хәйбулла районының Оло Әбеш ауылында йәшәгән Нурсилә Хәмитйән ҡыҙы күҙ йәшен тыя алманы. Бынан ете йыл самаһы элек була был хәл. Ауыл араһынан яҙғы ҡар һыуҙары менән ағып төшкән Арба йылғаһының, аҫҡы яҡта, ярҙарына һыймай ташып аҡҡан Һаҡмар йылғаһына ҡойған хәүефле урын була. Дүртенсе балаға йөклө әсә ете йәшлек улының ҡул араһынан сығып ысҡын­ғанын күрмәй ҙә ҡала. Уны эҙләгән мәлдә, бер кем­дең дә башына һыймаҫлыҡ хәлдәр булып өлгөрә. Бер төркөм балалар ошо йылғаларҙың ҡушылдығында уйнап йөрөгән. Шул саҡ ете йәшлек малай һыуға ҡолап төшә. Өлкәнерәктәре ололарҙан ярҙам һорап йүгерә алмай ҡурҡып-албырғап торған саҡта уның артынан һигеҙ йәшлек икенсе малай һикерә. Арба йылғаһы ҙур йылғаға барып ҡушылыуға бер нисә метр ғына ҡалғанда, барып тотоп, бата-сума һалҡын һыуҙы йырып бәләгә тарыусыны ярға алып сыға малай. Әҙ генә өлгөрмәһәләр, ҙур Һаҡмарҙа уларҙы хатта ололар ҙа ҡотҡарып ҡала алмаҫ ине, тип фаразлай ауыл халҡы. Үҙенән бер йәшкә генә кесе тиң­дә­шен ҡотҡарырға һикергән Айсарҙың бер ҡасан да был ярҙа, был урамда уйнағаны булмай, өҫ­кө урамдан был яҡҡа ниңә килгәнен үҙе лә белмәй, ул көндө байрамға әҙерләнеп йөрөгән ата-әсәһе лә аңлата алмай. Ә иң ғәжәбе, ул ваҡытта ташҡын һыу эсендә әжәлгә ҡаршы көрәшкән ике малай ҙа йөҙә белмәгән була. Шулай булыуға ҡарамаҫтан, иптәшен ҡотҡарыр өсөн ташҡын һыуға һикергән баланың был эше – ҙур батырлыҡ! Ә инде ҡотҡарылған малайҙың әсәһе, Аллаһы Тәғәләнең ярҙамы төшкәндер, тип ышана. Бөтә мәктәп линейкаһында батыр малайға рәхмәт әй­тәләр, быйыл иһә, “Һуңғы ҡыңғырау” көнөндә, ғә­зиз балаһының ғүмерен ҡотҡарып алып ҡалыуға ете йыл ваҡыт үтһә лә, мәктәпте тамамлаған ҡотҡарыусы егеткә тағы ла бер тапҡыр рәхмәтен әйтеп, бәләкәй генә бүләктәрен дә тапшырған әсәй кеше. Әйткәндәй, Айсар – Аҡсәскә менән Фәрхәт Әб­делмәновтарҙың ғаиләһендә уртансы бала. Ауылдаштарына, туғандарына ярҙамсыл, ихлас, уңған ғаилә тип ихтирам итә кешеләр уларҙы. Ғаилә башлығы ҡырҙа эшләһә лә, мал-тыуарҙы күпләп тотоп, йәшелсә, емеш-еләк үҫтереп, бәрәкәтле донъя көтә улар. Ҡорған донъяларын инде үҫеп килгән малай­ҙары менән берлектә ҡатыны Аҡсәскә Рәсүл ҡыҙы алып бара. Ул был яҡтарға Бөрйән рай­о­нынан килен булып төшкән. Уны ике район халҡы ғына түгел, бар республикала ҡул эштәре оҫтаһы булараҡ беләләр. Өлкән ҡыҙҙары Азалия ла, төрлө кейемдәргә үҙ ҡулы менән милли биҙәктәр һалып, районда үҙ эшен алып бара. Батырлыҡ яуҙа ғына түгел, егет кеше өсөн көндәлек тормошта ла һынала. Ошондай матур, татыу ғаиләлә дөрөҫ тәрбиә алған Айсар Әбделмәновтың иптәштәре өсөн генә түгел, бар йәмғиәт файҙаһына яуаплы, оло шәхес булып үҫеренә иманым камил! Таңсулпан БАЙТИМЕРОВА