Яңауыл районының Байғужа ауылында йәшәгән Фәриха апай Матнурова кеүектәрҙе “торғаны бер хазина” тиҙәр. Ысынлап та, ниндәй генә шөғөлдәре юҡ уның! Бәйләү, тегеү, сигеү кеүек ҡул эштәренән тыш, халыҡ медицинаһын ныҡлы өйрәнә, төрлө дарыу үләндәре йыя, шифалы майҙар, төнәтмәләр эшләй. Быға тиклем беҙ уның дарыу үләндәренән шифалы май, төнәтмә эшләү серҙәре менән уртаҡлашҡайныҡ. Ә бөгөн уның тағы бер матур шөғөлө – бәйләм бәйләүе, кибеттә һатылған ғәҙәти селтәрҙәргә сәскә сигеп, үҙенсәлекле ҡул эше өлгөләре булдырыуы тураһында һөйләмәксебеҙ. Ишек, тәҙрә пәрҙәләрен үҙе бәйләп, кибеттә һатылған ап-аҡ селтәрҙәрҙе нағышлап сигеп элгән. Ултырғыс, өҫтәл, диван, карауат япмалары ла аллы-гөллө биҙәктәре менән һоҡландыра. Бер диван япмаһын бәйләүгә яҡынса 15 көн ваҡыт китә икән. – Балалар бәләкәй саҡта бөтә кейемде тиерлек үҙем бәйләп кейҙерҙем. Ейәндәремә лә һәр ваҡыт үҙ ҡулым менән бүләк әҙерләүҙе хуп күрҙем. Был шөғөлөмдө ҡыҙҙарым да үҙ итте, Зәмфирәм айырыуса матур бәйләй, – ти оҫтабикә. Тәҙрә селтәрен сигеүе менән айырым ҡыҙыҡһындыҡ. “Бер ҡыйынлығы ла юҡ, кибеттә һатылған ғәҙәти аҡ селтәрҙең сәскәләрен шул уҡ һүрәт буйынса төҫлө еп менән сигәм. Сағыу, матур ҡул эше килеп сыға”, - ти Фәриха Сәйҙел ҡыҙы. Фәриха апай Матнурова кеүектәрҙе “торғаны бер хазина” тиҙәр. Ысынлап та, ниндәй генә шөғөлө юҡ уның! 40 йыл дауамында Байғужа мәктәбендә рус теле һәм әҙәбиәтенән уҡытҡан хөрмәтле мөғәллимә, Рәсәйҙең мәғариф алдынғыһы ул. Айрат Нурмөхәмәтов һәм автор фотолары.