“Демография” милли проектының “Башҡортостан Республикаһында бала тыуғанда ғаиләләргә финанс ярҙамы” төбәк проекты сиктәрендә өсөнсө йәки артабанғы балалар тыуған осраҡта тәғәйенләнгән айлыҡ аҡсалата пособие түләү дауам итә. Был түләү күләме – 12271 һум (Башҡортостанда балаға йәшәү минимумы күләме), ул балаға өс йәш тулғансы тормошҡа ашырыла. 2023 йылда ошо түләү төрөнә 3,52 миллиард һум ҡаралған, шул иҫәптән федераль бюджеттан – 2,93 миллиард һум, Башҡортостан Республикаһы бюджетынан – 0,59 миллиард һум. 2023 йылдың 1 авгусына республиканың 25 833 күп балалы ғаиләһе ошо түләүҙе ала. Иҫегеҙгә төшөрәбеҙ, РФ Президентының балалы ғаиләләргә ярҙам итеү системаһын булдырыу буйынса йөкләмәһен үтәү сиктәрендә 2023 йылдың 1 ғинуарынан алып берҙәм пособие индерелде, уға өсөнсө һәм артабанғы бала өсөн айлыҡ түләү инә. Шулай уҡ Башҡортостанда тыуымды арттырыу маҡсатында Башҡортостан Хөкүмәтенең 2020 йылдың 11 февралендәге 106-сы бойороғо менән раҫланған “юл картаһы” ғәмәлгә ашырыла. Эш дүрт йүнәлеш буйынса алып барыла: халыҡтың репродуктив сәләмәтлеген яҡшыртыу; репродуктив йәштәге халыҡтың кәмеү күләмен әҙәйтеү; балалы ғаиләләрҙең ыңғай образын булдырыу; бала тыуғанда һәм тәрбиәләүҙә ғаиләләргә уңайлы шарттар булдырыу буйынса финанс булмаған сараларҙы тормошҡа ашырыу. Яҡынса иҫәпләүҙәр буйынса, “юл картаһы” саралары 2024 йылға тиклем 6,3 мең бала табыуҙы өҫтәмә арттырыуға булышлыҡ итә ала. Билдәле булыуынса, "Демография" (национальный проект “Демография”) милли проекты Рәсәй Президенты Владимир Путиндың май указы менән булдырылды. Фото: "Уфимские нивы".