Ҡаҙағстан Республикаһына эш сәфәре сиктәрендә Башҡортостан Хөкүмәте Премьер-министры Андрей Назаров Рәсәй Федерацияһының Ҡаҙағстан Республикаһындағы Ғәҙәттән тыш Һәм Тулы хоҡуҡлы илсеһе Алексей Бородавкин менән осрашты. – Бер нимәгә ҡарамаҫтан, беҙҙең ике яҡлы хеҙмәттәшлегебеҙ дауам итә. Ағымдағы йылдың тәүге биш айында үҙ-ара тауар әйләнеше 239 миллион доллар кимәленә барып баҫты. Шул уҡ ваҡытта экспорт 204 миллион доллар тәшкил итә, был уҙған йылдың ошо уҡ осоронан 9,5 процентҡа юғарыраҡ, – тине Министрҙар кабинеты етәксеһе. Башҡортостан Хөкүмәте Премьер-министры билдәләүенсә, Башҡортостан экспорты нигеҙендә химия сәнәғәте продукцияһы, аҙыҡ-түлек тауарҙары һәм сеймал, минераль продукция бар. Май айында республиканың рәсми делегацияһы машиналар эшләү һәм металл эшкәртеү буйынса IV халыҡ-ара махсуслаштырылған күргәҙмәлә ҡатнашты. Унда ла ике яҡлы хеҙмәттәшлекте үҫтереү буйынса саралар ҡаралды. Рәсәй Федерацияһының Ҡаҙағстан Республикаһындағы Ғәҙәттән тыш һәм Тулы хоҡуҡлы илсеһе Алексей Бородавкин Рәсәй-Ҡаҙағстан мөнәсәбәттәре хаҡында һөйләне. Уның әйтеүенсә, ике дәүләт башлыҡтары күп осрашыуҙар үткәрә һәм хоҡуҡи мөнәсәбәттәргә ҡағылған мәсьәләләрҙе тикшерә. – Быйыл көҙ Рәсәй менән Ҡаҙағстан араһында президенттарыбыҙ ҡатнашлығында сираттағы төбәк-ара форум үтәсәк, – тине Алексей Бородавкин. – Һөҙөмтәлә яңы килешеүҙәр булыр, тип ышанабыҙ. Башҡортостан да был сараға тос өлөш индерер, тип уйлайбыҙ. Эш осрашыуы аҙағында Башҡортостан Хөкүмәте Премьер-министры Рәсәй Федерацияһының Ҡаҙағстан Республикаһындағы Ғәҙәттән тыш һәм Тулы хоҡуҡлы илсеһенә осрашыу өсөн рәхмәт белдерҙе. Шулай уҡ эшлекле сәфәр сиктәрендә Ҡаҙағстан Республикаһы Премьер-министры Алихан Смаилов менән осрашыу көткәне хаҡында хәбәр итте. Унда ике яҡлы килешеүҙәр төҙөү, өҫтәмә тура авиарейстар асыу һәм башҡа һорауҙар ҡараласаҡ. Башҡортостан Хөкүмәте етәксеһе халыҡтарҙың мәҙәни мираҫын һәм рухи традицияларын һаҡлау һәм популярлаштырыу маҡсатында Башҡортостан һәм Ҡаҙағстан республикалары көндәрен үткәреү башланғысы менән сығыш яһаны. 2024 йылдың июлендә Екатеринбургта үтәсәк “Иннопром” күргәҙмәһе алдынан Башҡортостанда Ҡаҙағстан көндәрен ойоштороу тәҡдим ителде. Фото: pravitelstvorb.ru