Үҙәк китапхананың өҫтөнлөклө йүнәлеше – мөмкинлектәре сикләнгән кешеләр менән эшләү. Конкурс һайлап алыуында еңеп, “Асыҡ мөхит” дәүләт программаһы сиктәрендә Ишембайҙың Үҙәк ауыл-ара китапханаһында халыҡтың аҙ хәрәкәт иткән төркөмдәре өсөн пандустар ҡуйылған санузел, инеү урыны ремонтланды. Китапханала насар күргән кешеләр өсөн “Сикһеҙ донъя” үҙәге эшләй. Үҙәк китапханала Альбина Нәсибуллина булды, ул инвалид коляскаһында хәрәкәт итә. Китапхана хеҙмәткәрҙәре уҡыусыны яңыртылған китапхана менән таныштырҙы. Зоналар күрһәтелде, яңы ҡорамалдар хаҡында һөйләнеләр. Альбина Ринат ҡыҙы белеме буйынса китапханасы, шуға күрә уға китапхана менән яҡындан танышыу бик ҡыҙыҡлы була. Һөйләшеүҙән уның бисерҙан үреү менән шөғөлләнеүен билдәле була һәм китапхана базаһында оҫталыҡ дәресе үткәрергә тәҡдим итәләр, быға Альбина Ринат ҡыҙы шатланып ризалаша Осрашыу йылы һәм ҡыҙыҡлы үтә. “Үҙәк китапханаға барып, мин һоҡланып ҡайттым. Яңыртҡандан һуң уға яңы төҫтәр өҫтәлде. Китапхана зоналарға бүленгән, һәр кем үҙенә ҡыҙыҡлы шөғөл таба ала. Миңә, коляскала ултырған кешегә, китапхана буйлап йөрөү һис тә ауыр булманы. Беҙҙең өсөн барыһы ла ҡаралған урындарҙың булыуына бик шатмын”, – тип үҙ фекере менән уртаҡлашты Альбина Нәсибуллина. Билдәле булыуынса, "Мәҙәниәт" (национальный проект “Культура”) милли проекты Рәсәй Президенты Владимир Путиндың май указы менән булдырылды. Фото: Ишембай районы хакимиәте.