Халыҡ-ара “Башҡорт аты” фестивале сиктәрендә үткәрелгән 17-се республика ҡымыҙ эшләүселәр конкурсына йомғаҡ яһалды. Баһалама ағзалары ҡарары буйынса, Әбйәлил районынан иң күп балл йыйған Ильяс Һибәтов иң яҡшы ҡымыҙ яһаусы тип танылды. Икенсе урынды Йәрмәкәй районынан Наталья Дик хужалығы алды. Әлшәйҙән Фидан Әхмәтйәнов - өсөнсө урында. Конкурста иң оло һәм оҙаҡ йылдар ошо эш менән шөғөлләнеүсе - Йылайыр районынан Марат Абдулов, иң йәше һәм креативы – Әлшәй районынан Динар Ахунов. Тамашасылар һөйөүе призына Әбйәлил районынан Гөлназ Әминева, Белорет районынан Рәүф Мәғәфүров һәм Баймаҡ районынан Илнур Хәмитов лайыҡ булды. Гран-при – Учалы районы ҡымыҙсыһы Лилиә Сәғәҙәтовала. Ҡатнашыусылар бындай конкурстың мөһимлеген, уның юғары кимәлдә ойошторолоуын, традицияға әйләнеүен билдәләне. Шулай уҡ бындай конкурс ҡымыҙҙы юғарыраҡ кимәлгә сығарырға ярҙам итеүе тураһында ла әйтеп үтелде. Мәғлүмәт һәм фото: Ауыл хужалығы министрлығы матбуғат хеҙмәте.