Алдан хәбәр итеүебеҙ буйынса, 8 августа Благовещенда Ағиҙел йылғаһында шаһиттар батып барған туғыҙ йәшлек ҡыҙыҡайҙы ҡотҡарҙы. Баланы ауыр хәлдә тәүҙә район үҙәк дауаханаһына алып барғандар, аҙаҡ Өфөгә балалар республика дауаханаһына оҙаттылар. Ул батҡан һәм ныҡ өшөгән ине, әле ғүмеренә бер нимә лә янамай тиҙәр. Бөгөн иһә райондың “Панорама” баҫмаһы ҡыҙҙы үлемдән ҡотҡарған кешенең кемлеген асыҡлаған. Ул Благовещен ҡалаһы кешеһе Виктор Молчанов булып сыҡҡан. Ир һыу буйында ял иткән һәм ҡайтырға йыйына башлағас, янына бер ҡатын килеп һыуҙа кеше кәүҙәһенә оҡшаған нәмә йөҙөп йөрөй тигән. Ә уға тиклем һыу буйында ике ҡыҙ уйнап йөрөгән, ә хәҙер ярҙа береһе генә ҡалған... Виктор шунда уҡ йылғаға һикергән һәм ағым һыу алып китеп барған ҡыҙҙың кәүҙәһен тотоп ярға сығарған. Бала был ваҡытта тын алмаған. Ир ОБЖ дәрестәрен иҫенә төшөрөп, уға реанимация саралары үткәрә башлаған. Шул саҡта янына “Полиэф” хеҙмәткәрҙәре йүгереп килеп етә. Сергей Имучаев тигән кеше уның йөрәгенә массаж эшләй һәм яһалма тын алдыра башлай. “Ашығыс ярҙам” килеп етеүгә, ҡыҙ тын ала башлай. “Миңә “Полиэф”та үткән беренсе ярҙам күрһәтеү курстары ярҙам итте. Бала тын ала башлағас шатлығымдан күҙ йәштәре аға башланы. Уның менән барыһы ла яҡшы булһын, был осраҡ уның өсөн тәүге һәм һуңғы булһын ине тип теләйем”, – тигән ир. Виктор Молчанов сауҙа вәкиле булып эшләй, ҡатыны менән өс ҡыҙын тәрбиәләй. Ә бата яҙған ҡыҙҙың әсәһе әйтеүенсә, ул биш бала тәрбиәләй. Ул көндө ҡыҙы балалар майҙансығында уйнайым тип әйтә, тик үҙе класташы менән һыу буйына китә. “Ул тышҡа уйнарға сыҡты һәм 20 сәғәттә өйҙә булам тине. 18 сәғәттә мин үҙем уҡып йөрөгән автомәктәпкә киттем. Бәләкәй балалар менән няня ҡалғайны. 19.30-ҙа бушаным һәм магазинға барам тигәйнем, реанимациянан шылтыраттылар. Ҡыҙым һыуҙан ҡурҡа, йөҙә белмәй. Шуға күрә минһеҙ һыу буйына бармай торғайны. Ә фажиғә көнөндә уны класташы нисектер күндергән. Баламды үлемдән ҡотҡарған кешеләргә сикһеҙ рәхмәтлемен”, – тигән ҡатын. Фото: Телеграм.