Бөгөн, 11 августа, Өфөләге “Торатау” конгресс-холында республиканың мәғариф хеҙмәткәрҙәренең сираттағы август кәңәшмәһе үтте. Уның барышында ете фекер алышыу майҙансығы ойошторолдо. Уларҙа Башҡортостан Республикаһында Уҡытыусы һәм остаз йылына билдәләнгән сараларҙың үтәлеше, “Беренселәр хәрәкәте” балаларҙың һәм йәштәрҙең ижтимағи-дәүләт хәрәкәтенең үҫеше, “Директорҙың тәрбиә һәм балалар йәмәғәт берләшмәләре менән эшмәкәрлек итеү буйынса советнигы” проектын тормошҡа ашырыу, берҙәм хәрби-патриотик тәрбиә системаһын булдырыу, урта һөнәри белем биреү тармағын үҫтереүгә ҡағылышлы мәсьәләләр ҡаралды. Уҡытыусыларҙың август кәңәшмәһенең пленар өлөшөндә Башҡортостан Башлығы Ради й Хәбиров, БР мәғариф һәм фән министры Айбулат Хажин, Рәсәй Федерация Советының Фән, мәғариф һәм мәҙәниәт буйынса комитеты рәйесе Лилиә Ғүмәрова, БР Хөкүмәте ағзалары, юғары уҡыу йорттары ректорҙары, мәктәп директорҙары, уҡытыусылар, район һәм ҡала хакимиәттәре вәкилдәре, хөрмәтле мәғариф ветерандары ҡатнашты. Республика август кәңәшмәһе барышында мәктәп автобустары тапшырыу тантанаһы үтте. Был көндә 18 өр-яңы автобус Башҡортостан райондарына юлланды. Мәктәп директорҙарына уларҙың асҡысын БР мәғариф һәм фән министры Айбулат Хажин тапшырҙы. - Бөгөн республикабыҙҙағы мәктәп автобустары паркы тағы ла яңы техника менән тулыланды. Әлеге ваҡытта 52 мең самаһы баланы уҡыу урынына мәктәп автобусы менән йөрөтөү ойошторолған. Волителдәргә хәйерле, имен юлдар теләйем! - тине Айбулат Вәкил улы. Ишембай ҡалаһындағы 19-сы урта мәктәп тә яңы техникаға эйә булып ҡыуанды. Яңы автобусҡа идара итәсәк Николай Попков – ҙур тәжрибәгә эйә волитель. "Эшемде яратып башҡарам, беҙҙең эштә иң мөһиме - балаларҙың хәүефһеҙлеге һәм именлеге", - ти Николай Сергеевич. Мәктәп директоры Райхан Әнүәр ҡыҙы Мәҡсүтова билдәләүенсә, был – уларҙың мәктәбенә бирелгән икенсе автобус. Бөгөн был белем усағына 100-гә яҡын баланы автобус менән уҡыуға йөрөтөү ойошторолған. Айрат Нурмөхәмәтов фотолары.