Беҙҙә көслө педагогтар армияһы тупланған

Бөгөн, 11 августа, Өфөләге “Торатау” конгресс-холында республиканың мәғариф хеҙмәткәрҙәренең сираттағы август кәңәшмәһе үтә. Уның барышында ете фекер алышыу майҙансығы ойошторола. Уларҙа Башҡортостан Республикаһында Уҡытыусы һәм остаз йылына билдәләнгән сараларҙың үтәлеше, “Беренселәр хәрәкәте” балаларҙың һәм йәштәрҙең ижтимағи-дәүләт хәрәкәтенең үҫеше, “Директорҙың тәрбиә һәм балалар йәмәғәт берләшмәләре менән эшмәкәрлек итеү буйынса советнигы” проектын тормошҡа ашырыу, берҙәм хәрби-патриотик тәрбиә системаһын булдырыу, урта һөнәри белем биреү тармағын үҫтереүгә ҡағылышлы мәсьәләләр ҡараласаҡ. Ошо айҡанлы БР мәғариф һәм фән министры Айбулат ХАЖИНға мөрәжәғәт итеп, педагогтар йәмәғәтселегенең мөһим ваҡиғаны ниндәй кәйефтә, ниндәй яңылыҡтар менән ҡаршылауы тураһында ҡыҙыҡһындыҡ. – Тиҙҙән, 1 сентябрҙә, Башҡортостан мәктәптәре яңы 2023/24 уҡыу йылын башлап ебәрәсәк. Мәктәп партаһына ярты миллиондан ашыу бала ултырасаҡ, уларҙың 54 меңгә яҡыны белем усаҡтары ишеген тәүге тапҡыр асасаҡ. Шулай уҡ быйыл Башҡортостан мәктәптәрендә Донбасстан 209 бала уҡыу йылын башлай. Бөтә урында ла тантаналы линейкалар 1 сентябргә билдәләнгән. Республиканың мәғариф учреждениеларында мәктәп системаһын үҙгәртеп ҡороу, ябайлаштырып әйткәнебеҙсә, мәктәптәрҙе капиталь ремонтлау программаһы уңышлы ғәмәлгә ашырылып килә. Ағымдағы йылда әлеге маҡсатта, йәғни ремонт, төҙөкләндереү һәм йыһазландырыу эштәренә 4,3 миллиард һум аҡса бүленде, шуның 3,6 миллиард һумы федераль бюджет иҫәбенән. Быйыл ошо федераль программаға ярашлы, 28 районда 77 бина ремонтлана. Был күрһәткес буйынса төбәктәр араһында икенсе урында билдәләнәбеҙ. Һөҙөмтәлә 17 мең бала уҡыу йылын яңыртылған белем усағында башлаясаҡ. Республика мәктәптәрендә балаларҙы йылы аш менән тәьмин итеү мәсьәләһе лә иғтибар үҙәгендә. Барлыҡ башланғыс класс уҡыусылары бушлай туҡланыу менән тәьмин ителә, ошондай уҡ социаль яҡлау сараһы льготалы категорияға ҡараған уҡыусыларға ла булдырылған. Бында һүҙ сәләмәтлек йәһәтенән мөмкинлектәре сикләнгән, инвалидлыҡ төркөмөнә ингән, күп балалы ғаиләләрҙә тәрбиәләнгән уҡыусылар, шулай уҡ махсус хәрби операцияла ҡатнашҡан яугирҙәрҙең V – XI класта уҡыған балалары тураһында бара. 2023 йылда ошо категорияға ҡараған уҡыусыларҙы йылы аш менән тәьмин итеүгә 3 миллиард 655 миллион һум аҡса бүленде, шуның 1 миллиард 589 мең һумы – республика бюджетынан. Яңы уҡыу йылын республика мәктәптәре яңыртылған, төҙөкләндерелгән хәлдә ҡаршы ала, әҙерлек кимәлен баһалауға 1218 мәктәп тәҡдим ителде. Уҡыусылар имен, хәүефһеҙ шарттарҙа белем һәм тәрбиә алһын өсөн, республика ведомство-ара комиссияһы уларҙы һәр яҡлап ныҡлы тикшерә һәм баһалай. Комиссия составына Рәсәй Ғәҙәттән тыш хәлдәр министрлығының БР буйынса Баш идаралығы, Федераль именлек хеҙмәтенең, Эске эштәр министрлығының, РФ милли гвардияһы ғәскәрҙәренең федераль хеҙмәтенең, Ҡулланыусыларҙың хоҡуҡтарын яҡлау һәм кеше именлеге өлкәһендә күҙәтеү буйынса федераль хеҙмәттең төбәк идаралыҡтары, ата-әсәләр ойошмалары вәкилдәре ингән. Белем биреү эшмәкәрлеге менән шөғөлләнгән ойошмаларҙың яңы уҡыу йылына әҙерлеген баһалауҙы 17 августа тамамларға тип билдәләнгән. Мәктәп автобустарының паркын яңыртыуға ҙур иғтибар бүләбеҙ, сөнки был мәсьәләгә лә балаларҙың именлеге бәйле. 2023 йылдың 1 июненә ҡарата республикала 52253 баланы уҡыу урынына автобус менән йөрөтөү ойошторолған, был эшмәкәрлеккә 1522 берәмек техника йәлеп ителгән. Быйыл төбәк бюджеты иҫәбенә 18 мәктәп автобусы алынды. Бынан тыш, Рәсәй Хөкүмәтенең ағымдағы йылдың 27 июнендәге ҡарарына ярашлы, беҙҙең республикаға 49 автобус бүленде. Белем усаҡтарын яңы стандарттарға яуап биргән әсбаптар менән тәьмин итеү мәсьәләһе лә ыңғай хәл ителеп килә. Мәктәп китапханаларын яңыртыу буйынса алып барылған маҡсатлы эш һөҙөмтәһендә уҡыу әсбаптары һәм уҡыу кәрәк-ярағы алыуға сығымдар өлөшөн арттырыуға өлгәштек. Быйыл 1 ғинуарҙан был норматив бер уҡыусыға ҡарата 2500 һум тәшкил итә. Тарих фәнен берҙәм стандартҡа ярашлы уҡытыуҙы тәьмин итеү маҡсатында Рәсәй Мәғариф министрлығы X һәм XI класс уҡыусылары өсөн яңыртылған әсбаптар әҙерләне. Беҙ уларҙы үҙебеҙҙең республиканың мәктәптәренән тыш, Луганск Халыҡ Республикаһының Красный Луч ҡалаһындағы белем усаҡтары өсөн дә һатып алырға ҡарар иттек. Бының өсөн республиканың резерв фондынан 51 миллион һумға торошло өҫтәмә аҡса бүленде. Белеүегеҙсә, күптән түгел Рәсәй Президенты уҡыусыларға хеҙмәт тәрбиәһе биреүгә ҡағылышлы законға ҡул ҡуйҙы. Бында һүҙ йәш быуынды эшһөйәр, илһөйәр, хеҙмәткә яуаплы итеп тәрбиәләү тураһында бара. Күреүегеҙсә, заман педагогтар алдына яңы талаптар, яңы бурыстар ҡуя. Респуб­ликабыҙҙың мәғариф хеҙмәткәрҙәренең уларҙы лайыҡлы үтәренә, яңы башланғыстарға ең һыҙғанып тотонорона иманым камил, сөнки беҙҙә үҙ эшен яратҡан, һөнәренең оҫтаһы булып танылған, яңылыҡтарҙан ҡурҡмаған, ҙур маҡсаттар ҡуйып, шуларҙы тормошҡа ашырып эшләй белгән берҙәм һәм көслө педагогтар армияһы тупланған. Уларҙың белеменә, көсөнә ышанырға ла, таянырға ла була. Гөлдәр ЯҠШЫҒОЛОВА