Найти тему
Башҡортостан гәзите

“Кәрәҙҙәр” танылыу яулай

Башҡортостанда өсөнсө йыл рәттән республика педагогтары араһында “Кәрәҙҙәр” тип аталған үҙенсәлекле марафон ойошторолоп килә. Сараны БР Мәғариф һәм фән министрлығы Башҡортостан Республикаһында алдынғы белем биреү-мәғрифәти проекттарына булышлыҡ итеү һәм уларҙы тормошҡа ашырыу буйынса “Киләсәк мәғарифы” педагогик лабораторияһы” төбәк һөнәри йәмәғәт ойошмаһы менән берлектә уҙғара. “Кәрәҙҙәр” марафоны биш мәғрифәти аралашыу майҙансығын берләштерә. Ул уҡытыусыларға үҙ-ара тәжрибә уртаҡлашыу, иң яҡшы белем биреү практикаларын күрһәтеү һәм өйрәнеү, һөнәри йәһәттән үҫешкә булышлыҡ итеү маҡсатында ойошторола. Быйылғы III “Кәрәҙҙәр” республика марафонына 1 августа старт бирелде. Был көндө уның зона ярышы – Сибай ҡалаһында, 3 августа – Стәрлетамаҡта, 5 августа – Яңауыл ҡалаһында, 7-һендә – Бәләбәйҙә һәм 8 августа Өфө ҡалаһында уҙҙы. Әйткәндәй, был төбәктәрҙең командалары – былтырғы конкурстың еңеүселәре, йәғни беренсе урынды яулаған район йәки ҡала киләһе зона ярышын үҙ биләмәһендә үткәреү хоҡуғына эйә була. Сибай ҡалаһында үткән зона бәйгеһе быйылғы марафондың тәүге майҙансығы булыуы һәм йылдан-йыл педагогтар йәмәғәтселегендә киңерәк танылыу яулай барған сараны асып ебәреүе менән иҫтәлекле булды. Башҡортостандың Мәғариф һәм фән министрлығынан бүлек начальнигы Жанна Миңлекәева, “Киләсәк мәғарифы” педагогик лабораторияһы һәм “Башҡортостан баш ҡалаһының йыл уҡытыусыһы” клубы етәксеһе, баһалама рәйесе Сергей Переверзев, Сибай ҡалаһы ҡала округы хакимиәтенең мәғариф идаралығы начальнигы Рушан Дияров ҡатнашыусыларға изге теләктәрен еткерҙе. Конкурс барышында һәр команда үҙ муниципалитетының мәғариф системаһын танытты, был бәйге “Мин – уҡытыусы, был бик текә!” тип аталды. “Педагогик СТиЭМ” бәйгеһе ижади һәләттәрҙе асыуға, үҙенсәлекле тәжрибәләр, идеялар менән уртаҡлашыуға ҡоролдо. Был зонала Белорет районы уҡытыусылары командаһы еңеүсе булып танылды, икенсе урында – Сибай, өсөнсөлә – Баймаҡ педагогтары. Йылайыр, Ейәнсура, Әбйәлил, Хәйбулла, Учалы райондары, Межгорье ҡалаһының мәғариф хеҙмәткәрҙәре командалары төрлө номинацияларҙа билдәләнде. Яңауыл ҡалаһының Йәштәр һарайында үткән “Кәрәҙҙәр” республика марафонының зона ярышы Ҡариҙел, Асҡын, Балтас, Бөрө, Борай, Дүртөйлө, Саҡмағош, Ҡалтасы, Краснокама, Мишкә, Тәтешле райондары һәм Ағиҙел ҡалаһы уҡытыусыларын бергә тупланы. Был майҙансыҡта Ҡариҙел районы уҡытыусылары командаһы еңеүсе булды, уларҙың “Ынтылыш” тип аталған командаһына Ҡариҙел ауылындағы 1-се урта мәктәптән педагогтар Илнур Билалов, Винер Кәримов, Гөлшат Шаматова, ошо уҡ ауылдағы 2-се урта мәктәптән Розалия Зиәтдинова һәм Эльвера Исламова берләшкән ине. Икенсе урында – яңауылдар, өсөнсөлә бөрөләр билдәләнде. – Барлыҡ командалар ҙа һөнәри йәһәттән оҫталығын күрһәтеүгә өлгәште, сығыштар йөкмәткеле, сағыу булды, уҡытыусылар һәр ваҡыттағыса үҙҙәренең маҡсатлы, ныҡышмал, тәүәккәл һөнәр эйәләре булыуын раҫланы. Районыбыҙ намыҫын лайыҡлы яҡлаған Яңауыл командаһы ағзаларына – Р. Гәрәев исемендәге урта мәктәп директоры Флүр Сәләховҡа, Йәш техниктар станцияһы директоры Ирек Исламгәрәевкә, Яңауыл районының мәғариф идаралығы белгесе Карина Киселеваға, И. Мөҡсинов исемендәге гимназия уҡытыусылары Альбина Атдиноваға һәм Анна Павловаға “Афарин!” тибеҙ, – тип билдәләне Яңауыл районының мәғариф идаралығы начальнигы Эльвира Финарис ҡыҙы Шәйехова. Стәрлетамаҡта үткән зона ярышында – Ишембай уҡытыусылары, Бәләбәйҙәге майҙансыҡта – Бәләбәй районы, Өфөлә баш ҡала командаһы педагогтары иң яҡшылар булып танылды. Гөлдәр ЯҠШЫҒОЛОВА