Ҡыйыу, дәртле егеттәрҙе көтәләр!

Башҡортостанда Рәсәй Геройы, яҡташыбыҙ Алмаз Сафин исемендәге яңы доброволецтар батальоны төҙөлә. Унда яҙылыусыларҙың тәүге төркөмө хәрби әҙерлек пункттарына оҙатылды. Хәрби хеҙмәткә контракт буйынса кемдәр ҡабул ителә? Был турала Башҡортостан юлдаш телеканалындағы “Интервью” тапшырыуында “Хәрби туғанлыҡ” Бөтә Рәсәй йәмәғәт ойошмаһының Әлшәй районы бүлексәһе етәксеһе Булат Флүр улы Төхвәтуллин менән һөйләштеләр. – Тағы бер батальон булдырыу башланғысы менән сыҡҡанһығыҙ. Ни өсөн уға тап Алмаз Сафиндың исемен бирергә булдығыҙ? – Июль аҙағында үҙебеҙҙең Әлшәй районы егеттәре менән һөйләшеү булды һәм республикала тағы бер батальон йыйылғанын ишеттек. Уға Алмаз Сафиндың исемен биреү тәҡдиме менән Башҡортостан Башлығы Радий Хәбировҡа сығырға килештек. Шунан район хакимиәте башлығы Дамир Мостафинға ла индек. Баҡһаң, районда ла был эш башланған булған икән. Туғандары, әсәһе менән һөйләшкәндәр. Әсәһенең апаһы беҙҙә РОНО-ла эшләй. Зилә Әхмәт ҡыҙы, улар барыһы ла буласаҡ батальонға Алмаздың исемен бирергә ризалығын биргән. Хатты район башлығына бирҙек, ул Радий Фәрит улына ебәрелде. 31 июлдә хатты ҡарағандар һәм, ысынлап та, яңы батальонға Алмаз Сафин исемен бирергә ҡарар иткәндәр тип ишеттек. Быға шатландыҡ, ул - районыбыҙҙағы иң йәш герой. Уға ҡарап киләсәк быуын үҫер, өлгө алыр, даны күтәрелер тип ҡыуандыҡ. Егеттәр ҡушыла башланы, икенсе райондарҙан да шылтыраталар. Аҙаҡ хәрби комиссариатҡа мөрәжәғәт иттек. Улар ҙа Алмаз Сафин исеме раҫланды, теләгәндәр райондың хәрби комиссариаттарына ғариза ҡалдыра ала тинеләр. – Тимәк райондың тәҡдиме республика Башлығы тарафынан хупланды. Һәм әле яңы батальон йыйыла башланы ла. Унда кемдәр мөрәжәғәт итә ала?– Контракт буйынса хеҙмәт итергә һаулығы яҡшы булған, 64 йәшкә тиклемге ир-ат килә ала. Офицерҙар ҙа, һалдаттар ҙа ҡушыла ала. Улар медицина комиссияһы үтергә һәм документтарын тапшырырға тейеш. – Батальонға юҡҡа ғына ҡыйыу Алмаз Сафиндың исемен бирергә ҡарар ителмәне. Унда йыйылған ир-егеттәр ниндәй сифаттарға эйә булырға тейеш тип уйлайһығыҙ?– Беҙҙең ир-егеттәр ҡурҡыу белмәй, бөтәһе лә дәртле. Башҡа батальондар буйынса ла беләбеҙ бит. – Әлеге ваҡытта батальонды ойоштороу нисек бара?– Бөгөндән хәрби комиссариаттарға ғариза яҙа башланылар. Күптәре документтарын әҙерләп бөткән, кемдәрҙер икенсе батальондан күсергә лә ниәтләнә тип ишеттек. Минеңсә, тиҙ арала йыйылып бөтөрҙәр. – Был батальон ниндәй ведомствоға ҡарай?– Рәсәй Оборона министрлығына. – Контракт буйынса барған ир-егеттәр өсөн ниндәй түләүҙәр ҡаралған?– Контрактҡа ҡул ҡуйғандан өс айҙан һуң 200 мең һум түләнә. Хәрби әҙерлек үткәндә айына 33-35 мең һумды Оборона министрлығы түләй, Башҡортостан Республикаһы көнөнә ике мең һум түләп бара. Тегендә барғас, айырым “боевой”ҙар түләнә. Вазифаһына ҡарап оклад билдәләнәсәк. – Ирекле батальонға ҡушылырға теләүселәр ҡайҙа мөрәжәғәт итә әла?– Райондағы хәрби комиссариатҡа. Улар Үҙәк хәрби комиссариатына бирә, тиҙерәк буласаҡ. Шулай уҡ башҡорт батальондарын туплаған үҙәктәр бар, унда ла мөрәжәғәт итеп, документ тапшырырға мөмкин. – Ир-егеттәр мотлаҡ әрме хеҙмәте үтергә тейешме? Белемдәренә ниндәй талап бар?– Батальонға ингән барлыҡ егеттәр ҙә махсус хәрби әҙерлек үтәләр. Белмәгәндәрен өйрәтәсәктәр. Яңы белгеслек биреүҙәре лә бар. Әрмелә булыу мотлаҡ түгел. – Контракт буйынса хеҙмәт итергә йыйынған ир-егеттәрҙең уртаса йәше күпме?– Уртаса 25-56 йәш. – Алмаз Сафин исемен йөрөткән батальонға ҡушылырға йыйынған ир-егеттәр ниндәй булырға тейеш? Уларға ниндәй теләктәрегеҙ бар?– Физик яҡтан да, әхлаҡи яҡтан да ныҡлы булырға кәрәк. Илде һаҡларға әҙер булырға тейештәр. Әле махсус хәрби операцияла ҡатнашҡан егеттәргә лә, яңы батальон составында барасаҡтарына ла иҫәнлек, ныҡлыҡ теләйбеҙ. Барыһы ла һәйбәт хеҙмәт итеп, илебеҙҙе һаҡлап, иҫән-һау әйләнеп ҡайтһындар.