Һуңғы ваҡытта бесән эшләү темаһы социаль селтәрҙә йыш яҡтырытла. Күптәр элегерәк бесән әҙерләгән саҡтарын һағынып телгә ала. Хәйер, бөгөн дә бесән эшләүселәр юҡ түгел. Түбәндәге авторҙың яҙмаһы ла тап ошо хаҡта. Автор менән килешәһегеҙме? "Әле бына бесән осоро. Кемдер эшләп бөттө, кемдер бесән ташый, кемдер элек бесән эшләгән саҡтарын иҫкә төшөрә. Бесән төргәге эргәһендә тороп фотоға төшөп, интернетҡа һалдым. "Хәҙер бесән эшләү рәхәт, арымайың да, бына элек..." - тип яҙыусылар булды. Башҡа яҡтарҙа бесәнде нисек эшләйҙәрҙер, бына беҙҙә һәр бер сантиметр ер ҡәҙерле. Кеше малды күп аҫырай. Ә бесәнлек әҙ. Быға тиклем күрше Ырымбур өлкәһе Алмалы ауылы ерҙәрен сабып кинәнә ине күп кеше. Ике йыл инде унда инвестор килеүенә. Йәки яңы арендатор тиһәм, дөрөҫөрәк булыр. Сиккә тиклем булған бесәнлектәрҙе баҫыуға әйләндерҙе. Ҡалған ғына бесәнлектәрҙе сабып алды. Ябай халыҡ торҙо ла ҡалды. Ауыл халҡы бесән еткереү өсөн үҙенең бесәнлегендә һәр ҡыуаҡлыҡ, ағас төбөн ялаған һымаҡ сабып ала. Картуф ултыртмаған яңғыҙ әбейҙәрҙең баҡсалары ялтырап ятып ҡала. Унда булған ғына үлән бағана төбөнә еткәнсе ялмап алына. Барыһы ла бесән булып кемдеңдер кәртәһенә ҡайтып ултыра. Хәҙерге заманда әллә ни яйлап бесән эшләп булмай. Беренсенән, ямғыр тейҙермәҫ өсөн тырышаһың. Икенсе яҡтан, урлатмаҫҡа тырышаһың. Эйе, бесән урлаусылар барлыҡҡа килде. Күбәләп ҡуйһаң да, тейәп китергә күп һорамайҙар. Төргәккә бигерәк йәһәт "айыу майы" һөртәләр. Тотолмағас, кем икәнен бында яҙып та булмай. Бигерәк профессиональ ҡыланалар. Көн, төн, таң, кис актив эшләйҙәр, арымайҙар улар, күҙеңде асып йомғансы яңы ғына әҙерләгән бесәнең кәмегән дә була. Шуға күрә техника менән бесәнде тиҙ генә эшләп алырға тырышаһың. Быйылғы йылдың прайс-лисы:Бесән саптырыу - гектары 2000-3000 һум,Тырматтырыу - гектары 1500-2000,Төргәккә төрөү (данаһы) - 300-350,Ташытыу (бер төргәк) - 150-170,Өйҙөрөү (бер төргәк) - 70-100Төрөлгән әҙер бесән - 1500-2000, ҡыш көнө 3000 һумға етә торған. Был хаҡ ҡайҙан сығып ҡуйыламы? Солярка хаҡынан, тракторсыларҙың көнө буйы трактор эсендә эҫе көн буйы эшләп йөрөүенең эш хаҡынан сығып. Тыңлап килгәстәре "рәхмәт" тип тик ултырабыҙ. Шулай булғас, бесән хаҡы ҡиммәт була инде. Әле бында бесән эшләгән саҡтағы сыҡҡан нервы хаҡы ҡушылмаған әле. Сөнки урлатмайым тип бер ҡайғыраһың, ямғыр яумаһын тип һәр бер болотҡа текләп хәл бөтә. Үҙеңдеке булмағас, техника тура килһен тип аптыраныуҙар. Ҡул менән эшләп була инде. Әгәр ҙә малың әҙ булһа. Күп булһа, ҡул менән эшләүҙең фәтүәһе юҡ.Бер һыйырҙы ҡыш аҫрап сығарыу өсөн иң әҙе 15 төргәк бесән кәрәк була. Һыйырҙы бесән менән генә тотһаң, әллә ни һөтө күп булмай бит әле ул. Ә һимертеп ит итәм тиһәң, пажалыста, ем-ярмаһы ла кәрәк. Шулай итеп ит бер нисек тә арзан була алмай. Әле беҙҙең яҡтарҙа иттең килогамы 450 һум тирәһе тора. Ҡыш етәрәк, артып та китер инде. Сөнки быйыл бесән бик әҙ. Ит 450 һумға һатылһа ла, сығымдарҙы ҡаплай тип әйтеп булмай. Күпкә ҡиммәтерәк булырға тейеш. Тик һатып алыусылары ла артыҡ аҡсаһы "ағып" тормаған кешеләр шул. Элек бесән эшләү ҡыҙыҡ ине, куңелле ине тиеүселәргә, ул ваҡыттарҙа бесән урлаусылар булмағандыр, тип әйтке килә. Ҡул менән артыҡ эшләге лә килмәй. Ауыл кешеһе булһаҡ та, һаулыҡ ҡәҙерле. Зарланып яҙманым, ә ауыл кешеһенең хеҙмәте дөрөҫ баһаланамы икән тип аңлатырға тырыштым.Киләһе яҙма көтөү тураһында буласаҡ. Ундай хаҡ башҡа бер яҡта ла юҡ. Әле һеҙгә бер бесән менән генә ит хаҡын аңлатырға тырыштым, бының эсенә көтөүгә йөрөтөү, ветеринар хеҙмәте (ҡолағына бирка, укол, ҡан алдырыу...) һәм башҡалар инмәгән әле. Бәлки, бер заман хаҡ һорай белербеҙ, һораған хаҡты бирерлек, лайыҡлы эш хаҡы алып эшләүсе һатып алыусылар булыр", - тип яҙа Фирүзә Хөсәйенова-Әбдрәхимова. Текст сығанағы: "Зөһрә йондоҙ" төркөмөнән.