Унда Әлшәй, Бәләбәй, Бишбүләк, Йәрмәкәй, Миәкә һәм Стәрлебаш районы етәкселәре ҡатнашты. Көн тәртибендә территорияларҙы социаль-иҡтисади үҫтереүҙең көнүҙәк мәсьәләләре ҡаралды. Фекер алышыуҙа министрлыҡ һәм ведомство вәкилдәре, район һәм ҡала хакимиәттәре башлыҡтары ҡатнашты. Тәүҙә төбәк етәксеһе муниципалитет предприятиелары һәм эшҡыуарҙарының продукцияһы күргәҙмәһен ҡараны. Унда Радий Хәбиров предприятие етәкселәренә республика программаларына ярашлы ярҙам саралары менән киңерәк файҙаланырға ҡушты. Шулай уҡ 2023 йылда был маҡсаттар өсөн 100 миллион һум аҡса бүленеүе хаҡында хәбәр итте. Төбәк етәксеһе үҙ сығышында урындағы үҙидара органдары эшенең көнүҙәк бурыстарын билдәләне. Шулай уҡ ул Башҡортостанды үҫтереү һәм 2023-2024 йылдарҙа үтәсәк мөһим социаль-сәйәси ваҡиғалар тураһында һөйләне. – Махсус хәрби операцияла ҡатнашҡан меңәрләгән егеттәребеҙ хәҙер алғы һыҙыҡта. Беҙ уларға ярҙам итергә, туғандары һәм яҡындары хаҡында хәстәрлек күрергә тейешбеҙ. Был эштә һәр кем ҡатнашһын. Тиҙҙән 1 сентябрь. Беҙҙең яугирҙәрҙең 600-гә яҡын балаһы беренсе класҡа барасаҡ. Уларға тейешле иғтибар бирергә һәм ярҙам күрһәтергә кәрәк, – тине Радий Хәбиров. Тағы бер йүнәлеш – төбәктең, муниципалитеттарҙың иҡтисадын һәм социаль өлкәһен үҫтереү. Башҡортостан Башлығы шулай уҡ республиканың мөһим инфраструктура проекттарын һәм социаль программаларҙы тормошҡа ашырыуҙы дауам итәсәген белдерҙе. Мәғариф өлкәһендә мәктәп биналарын модернизациялау буйынса президент программаһы тормошҡа ашырыла. Быйыл Башҡортостанда 77 мәктәп корпусы ремонтланасаҡ. Башҡортостан быйыл федераль ярҙам иҫәбенә 250 бәләкәй һәм урта класлы автобус аласаҡ. Улар район автотранспорт предприятиеларына ебәрелә. Артабан семинарҙа ҡатнашыусылар министрлыҡ һәм ведомство эксперттары ҡатнашлығында ауыл биләмәләрен үҫтереүҙең көнүҙәк темаларын тикшерҙе. Улар иҫәбендә ауылдарҙы төҙөкләндереү, транспорт һәм юл хужалығы, йәштәр сәйәсәте һәм спорт, халыҡ менән һөҙөмтәле эш итеү бар. Осрашыу аҙағында Башҡортостан Башлығы ҡатнашусыларға рәхмәт белдерҙе һәм артабанғы эштәрендә уңыштар теләне. Фото: glavarb.ru