8 сентябрҙә Яҡутов паркында “Йәшлек-FEST” креатив индустрияларҙың йәштәр форумы ойошторола. Бәйгелә 14-18 йәштәге уҡыусылар ҡатнаша ала. Форум Өфө ҡалаһы уҡыусыларының һөнәри йүнәлеш алыуына, шулай уҡ креатив индустрия өлкәһендә ҡала йәштәрен эшкә урынлаштырыуға булышлыҡ итеүгә йүнәлтелгән. Сара “Мәғариф” милли проектының маҡсаттарына һәм бурыстарына тап килә. Проект өс трек буйынса уҙасаҡ: “Медиа” (Медиа нигеҙҙәренә өйрәтеү һәм белемде практикала ҡулланыу); “Мәҙәниәт” (программаның берҙәм шоуын булдырыу һәм ҙур сәхнәлә сығыш яһау); “Бизнес” (үҙенсәлекле индустрия өлкәһендә бизнес алып барырға өйрәтеү); “Вакансиялар йәрминкәһе”. Сарала ҡатнашыусылар өсөн ойоштороусылар оҫталыҡ дәрестәре һәм ҙур концерт әҙерләй. Проект йомғаҡтары буйынса ҡаланың креатив йәштәр берләшмәһе булдырыласаҡ, унда проект сараларында иң әүҙем ҡатнашыусылар инәсәк. Проекттың беренсе этабы 8 сентябрҙә уҙғарыла һәм форум кампанияһын үҙ эсенә ала. II этап – 9 сентябрҙән 26 ноябргә тиклем. Һуңғыһы ҡаланың креатив йәштәр берләшмәһен булдырыуҙы, һигеҙ оҫталыҡ дәресе үткәреүҙе, шулай уҡ рәсми булмаған саралар ойоштороуҙы үҙ эсенә ала. Форумға теркәлеү 27 авгусҡа тиклем https://clck.ru/35BF8i һылтанмаһы буйынса асыҡ. Проект Йәштәр эштәре буйынса федераль агентлыҡ ярҙамында тормошҡа ашырыла. Билдәле булыуынса, "Мәғариф" (национальный проект “Образование”) милли проекты Рәсәй Президенты Владимир Путиндың май указы менән булдырылды. Фото: Йәштәр сәйәсәте буйынса дәүләт комитеты.