Райондың мәҙәниәт бүлеге етәксеһе Әлфиә Тайғонова әйтеүенсә, 2019-2020 йылдарҙа бинаның ҡыйығы, тәҙрә яңаҡтары, йылытыу, һыу менән тәьмин итеү системалары яңыртылған. Объектты сафҡа индереү өсөн стеналарҙы, электр сымдарын йүнәтергә, янғын сигнализацияһы һәм иҫкәртеү системаһы ҡуйырға, шулай уҡ бинаның тышҡы яғын рәтләргә кәрәк. Стәрлебаш районы хакимиәте башлығы Рөстәм Рахманғолов әйтеүенсә, ауылда 365 кеше йәшәй. Бында заманса клуб һәм башҡа социаль объекттар ныҡ кәрәк. Республика етәксеһе ремонт эштәрен быйыл уҡ тамамларға ҡушты. Яңыртылған бинала шулай уҡ фельдшер-акушерлыҡ пункты һәм китапхана урынлашыр, тип планлаштырыла. – 2019 йылдан алып ауылда бер генә социаль объект та юҡ, шуға бинаны тиҙ арала йүнәтеү мөһим, – тигән бурыс ҡуйҙы Радий Хәбиров. Сығанаҡ: glavarb.ru