8 августа Рәсәйҙең һаулыҡ һаҡлау министры Михаил Мурашко һәм Башҡортостан Башлығы Радий Хәбиров Өфө хосписын ҡараны. Был - илдәге өлкәндәргә һәм балаларға паллиатив ярҙам күрһәтеү өсөн проектланған берҙән-бер ойошма. Хоспис быйыл июнь аҙағында эшләй башланы. Уны Рәсәйҙең Федерация Советы рәйесе Валентина Матвиенко һәм Башҡортостан Башлығы Радий Хәбиров асты. Объект баш ҡаланың көньяғында урынлашҡан. Биналарҙың дөйөм майҙаны – 13 мең квадрат метр самаһы. Стационар 60 койка урынына иҫәпләнгән. Уларҙың 20-һе – балалар өсөн. Ата-әсәләр һәм туғандар өсөн айырым ҡунаҡ бүлмәләре ҡаралған. Ойошма биләмәһендә саф һауала йөрөү һәм балалар өсөн адаптив майҙансыҡ бар. Комплекс эшҡыуарҙарҙың һәм айырым кешеләрҙең хәйриә аҡсаһына төҙөлдө. Күп кенә компаниялар проектҡа үҙ хеҙмәттәре һәм продукцияһы менән ярҙам итте. Улар араһында “Газпром межрегионгаз Өфө», «Башинформсвязь», «Башҡортостан электр селтәре компанияһы», «ИСК», «Астро-лифт», «Өфөгорсвет», «Горзеленхоз» бар. “Башҡорт сода команияһы” ла хоспис төҙөлөшөнә һиҙелерлек өлөш индерҙе. Михаил Мурашко һәм Радий Хәбиров яңы объект биналарын ҡараны, медицина хеҙмәткәрҙәре һәм пациенттар менән аралашты. Өфө хосписы баш табибы Оксана Кузовкина быйыл июлдә Өфө хосписының пациенттарҙы ҡабул итә башлауы тураһында һөйләне. Авгсут башына ул тулы ҡеүәтенә тиерлек тулған. Барлыҡ биналар заманса мебель, ҡоролмалар, шул иҫәптән аҙ хәрәкәт иткәндәр өсөн дә менән йыһазландырылған. Бында шулай уҡ бассейн, процедуралар бүлмәләре, дарыухана, ял итеү бүлмәләре, балалар өсөн уйындар зонаһы һәм намаҙ уҡыу бүлмәләре бар. . Хосписта тағы Башҡорт дәүләт медицина университеты һәм төбәктәге медицина колледждары өсөн паллиатив ярҙам өлкәһендә уҡыу комплексы булдырылған. Фото, сығанаҡ: glavarb.ru/rus/press_serv/novosti/168871.html