Яңы офоҡҡа ҡарап яңы маҡсаттар ҡуйыла

Башҡортостан ҡошсолоҡ комплексы март айында яңы етәкселек ҡулына күсте, ҡошсолоҡ йүнәлеше яңы һулыш алды. “Союзпромптица” яуаплылығы сикләнгән йәмғиәте менән бөгөн ҡасандыр ошо ҡошсолоҡ комплексын проектлауҙа ҡатнашҡан, 11 йыл Ишембай районы хакимиәте башлығы, өс йыл Өфө фән һәм технологиялар университеты директоры булып эшләгән, иҡтисад фәндәре кандидаты Марат Ғайсин етәкселек итә, уның менән әңгәмә ҡорорға насип итте. – Марат Хөсәйен улы, компанияның үҫеше, киләсәккә пландары тураһын­да һөйләһәгеҙсе. – Беҙҙең йәмғиәттең концепцияһы һәм идеяһы – диетик аҙыҡ-түлек етештереү. Илдә күркә ите етештереү күләме буйынса, “Дамате”, “Черкизово” йәмғиәтенән ҡала, беҙ – өсөнсө урында. Йылына тереләй ауырлыҡта 32-35 мең тонна ит етештереп, илдәге эске баҙарҙы үҙебеҙҙең продукция менән тулыландырыу – беренсе сираттағы бурыс. Сауҙа селтәре булдырып, итте тирә-яҡ ҡалаларҙа һатасаҡбыҙ, үҙебеҙҙең илдә, шулай уҡ тышҡы баҙарҙа позицияларҙы эҙмә-эҙлекле яулауҙы маҡсат итеп ҡуйғанбыҙ. 24 илгә тауар сығарырға маҡсат бар. Көнбайыш Африкаға экспорт оҙатыуға аккредитация үтәбеҙ. Бөгөн “Индюшкин” тауар билдәһе менән күркә ите продук­цияһын Ҡырымда, Ростов, Силәбе, Мәскәү, Санкт-Петербург ҡалаларында осратырға мөмкин. Етештереү майҙанында 800 меңдән ашыу тоҡомло күркә бар. Күләмле күрһәткес етештереү генә етмәй, компаниялағы бар процестарҙы юғары кимәлдә яйға һалырға, цехтарҙа реконструкция үткәрергә ниәт­ләнәбеҙ. Ҡоштарҙы сифатлы аҙыҡ менән, йәғни Башҡортостанда етеште­релгән ем менән генә туҡландырабыҙ, бының өсөн йәмғиәттең үҙенең ҡатнаш аҙыҡ етештереү цехы бар. Тиҙҙән хәләл продукцияһы сертификаты алырға ниәт итәбеҙ. Сауҙа баҙарында халыҡтың ихтыяжын, технологик мөмкинлектәрен махсус өйрәнгән бүлек барлыҡҡа килде. Ассортимент байытыла, “Индюшкин” бренды менән сауҙа нөктәләрендә деликатестар, купат, сосиска, тарттырылған, ыҫланған, маринадланған һәм ҡурырға әҙер ит, ярымфабрикат һатыуға сығарыласаҡ. – Эшсе ҡулдар етәме? – Предприятиела 1200-ҙән ашыу эш урыны булдырылған. Әле әүҙем эшкә ҡабул итеү сараһы бара, күбеһенсә ит бүлеү цехына эшсе ҡулдар етмәй: мартта инкубаторға йомортҡалар һалғайныҡ, бөгөн күркә 20 килограмм ауырлыҡ йыйҙы, уларҙы иткә ебәрәбеҙ. Эш тәжрибәһе булмаған­дарҙы өйрәтәбеҙ, медицина кенәгәһенең булыуы һәм эшләргә теләк мотлаҡ. Йыраҡтан килеп эшкә урынлашҡандарға уңайлы шарттар булдырыла, йәшәргә ятаҡ бирелә. Һәр эштең үҙ ауырлығы бар, предприятиела һәр бурыс мөһим һәм яуаплы, шуға хеҙмәт хаҡы ла юғары. Бөгөн Күмертау ҡалаһынан килеп эшләгәндәрҙе автобус йөрөтә. – Илдә ҡошсолоҡ, малсылыҡ өл­кәһендә эпизоотик проблема ла юҡ-юҡта ҡалҡып сыға. Ул нисек хәл ителә? – Беҙҙең компания биологик хәүеф­һеҙлек мәсьәләләренә ҙур иғтибар бүлә. Бөтә санитар һәм ветеринар ҡағиҙәләрҙе үтәү – эшҡыуарлыҡтың нигеҙе, сөнки хеҙмәткәрҙәрҙең, бигерәк тә ҡулланыу­сыларҙың һаулығы өсөн ҙур яуаплылыҡ тоябыҙ. – Төбәк иҡтисадын үҫтереүгә тос өлөш индереп, лайыҡлы хеҙмәт хаҡы менән эш урындары булдырып, маҡсатлы, эҙмә-эҙлекле эш алып бараһығыҙ. Өмөт, уй-ниәтегеҙ байтаҡ, район, республика, ғөмүмән илдең агросәнәғәт тармағында үҫешкә йүнәлтелгән барлыҡ ниәттәрегеҙ яҡшы һөҙөмтә бирһен. Әҡлимә ИМАМОВА