Бихисап ат сабыштарында еңеү яулаған Степной ауылы егете Айгиз Тажетдинов тураһында районда белмәгән кеше һирәктер. Ә бына ошо уңыштарға килтергән, республика кимәлендә район данын яҡлаған “Алан” тигән ҡушаматлы арғымаҡ хаҡында нимә беләбеҙ һуң? “Аттың даны – егет ҡулында” тигәндәй, уның тураһында саптар аттың хужаһынан белештек. Бөгөн башҡорт тоҡомло аттарҙы үрсетеүҙәге проблемаларҙың береһе – уларҙың аҙ файҙаланылыуы. Башҡа тоҡомдар араһында юғалып барыу сигендәләр. Ошоға бәйле башҡорт тоҡомло аттарҙы мәҙәни, белем биреү сараларына киң йәлеп итеү, ауыл хужалығында, туризм өлкәһендә ҡулланыу мөһим мәсьәлә булып ҡала. Әлбиттә, аттарҙы ҡымыҙ һәм ит сығанағы итеп кенә ҡарарға ярамай, йылҡысылыҡ менән бер рәттән, ат спорты ла үҫешергә тейеш. Был йәһәттән район һабантуйында башҡорт тоҡомло аттар араһында айырым сабыштар, “Терра Башҡортостан” ат спорты турнирының муниципаль этабы уҙғарылыуы ҙур әһәмиәткә эйә. – Өс йәшлек “Алан”ды беҙ 2021 йылдың башында Учалы районында башҡорт тоҡомло аттар үрсеткән фермерҙан һатып алғайныҡ. Степнойға алып ҡайтҡас та, уны менгегә өйрәтә башланым. Был еңел бирелмәне – иректе үҙ иткән “Алан”дың холҡо ауыр ине, шуға күрә уның менән уртаҡ тел табыу ҡатмарлы булды. Әлбиттә, аттың холҡо хужаһынан тора, нисек өйрәтеүгә лә бәйле. Уны яратып, күберәк иғтибар биреп торғас, бер ай ярым самаһы ваҡыт үткәс, менгегә өйрәнде. Шул уҡ йылдың йәйендә “Алан”ды “Терра Башҡортостан” турнирына әҙерләй башланым. Был ул ҡатнашҡан тәүге ярыш булыуына ҡарамаҫтан, уның менән беренсе урын алыуға өлгәштек. Киләһе 2022 йылда “Терра Башҡортостан” турнирының өс этабында ла еңеү яуланыҡ. Арғымағым һабантуйҙарҙағы сабыштарҙа ла, башҡа ярыштарҙа ла һынатмай. Мәҫәлән, быйыл район үҙәгендә һабан байрамында үткән ат сабыштарында еңдек. Шулай уҡ Әбйәлил районында уҙған инвестиция һабантуйында, Хәйбулла районы һабантуйында уның менән бергә “Ылаҡ” уйынында ҡатнаштыҡ. Аҡъярҙа “Ҡышҡы уйындар”ҙа ойошторолған ат сабыштарында былтыр – беренсе, ә быйыл икенсе булып финиш һыҙығын үттек. Былтыр июлдә Баймаҡ районында уҙған 1-се “Башҡорт аты” фестивалендә ҡатнашып, башҡорт тоҡомло аттарҙың күргәҙмәһендә “Алан” беренсе урынға лайыҡ булды, – тип һөйләне йәш һыбайлы. “Башҡорт аты” фестивалендә һәм “Терра Башҡортостан” турнирында ҡатнашырға ниәтләнгән Айгизгә һәм уның “Алан” ҡушаматлы саптарына уңышлы сығыш яһарға яҙһын. Раян АТАНБАЕВ Хәйбулла районы.