Салауат Юлаев һәйкәле янында тағы бер һәйкәл буласаҡ

Өфөлә башҡорт милли биҙәүесе рәүешендәге арт-объект барлыҡҡа киләсәк. Ул Салауат Юлаев майҙанында “Торатау”конгресс-холы эргәһенә ҡуйыласаҡ. Әлеге ваҡытта Өфө мэрияһы был арт-объектты ҡуйыусы подрядсы эҙләү менән мәшғүл. Табылған осраҡта, контракт төҙөлгәндән һуң 20 көн эсендә, ҡала халҡын ҡыуандырып, был ғәҙәти булмаған һәйкәл ҡалҡып сығырға тейеш. Ул таяуҙарҙан, каркас, декоратив тышлыҡ һәм беләҙек менән аҫылмалы элементтарҙан торасаҡ. Документтарҙан күренеүенсә, бейеклеге 3-3,5 метр, ә материалдары тутыҡмай торған ҡорос, ҡорос торба һәм профилле ҡорос торба буласаҡ. Объект ҡышҡы ҡаты һыуыҡтарға ла, йәйге аномаль температураға ла сыҙарлыҡ итеп эшләнәсәк. Шулай булмай ни, уның хаҡы ла бит 3,04 миллион һумға баһалана. Сығымдың 2,9 миллионын федераль бюджет күтәрһә, төбәк бюджетынан – 60,2 мең, ҡала бюджетынан 27,3 мең һум бүленәсәк. Хәтерегеҙгә төшөрәбеҙ, бынан алда Өфөлә тағы бер нисә арт-объекттың барлыҡҡа килере билдәле булғайны, улар сәй, йәнлектәр, нефть, ҡулдар һәм башҡа әйберҙәрҙе һынландырасаҡ. Уларҙың дөйөм хаҡы – ҡала бюджетынан бүленгән 16 миллион һум. Баш ҡалабыҙ үҙенең киләһе йыл уҙасаҡ байрамына ҡарай яңырғандан-яңыра. Танымай ҙа торорһоғоҙ әле Өфөнө! Фотола: буласаҡ арт-объекттың өлгөһө.