Рәсәйҙең һаулыҡ һаҡлау министры Михаил Мурашко менән эшлекле осрашыу

7 августа Республика йортонда Рәсәйҙең һаулыҡ һаҡлау министры Михаил Мурашко менән Башҡортостан Башлығы Радий Хәбировтың осрашыуы үтте. Көн тәртибендә Федераль Һаулыҡ һаҡлау министрлығының төбәк менән үҙ-ара хеҙмәт бәйләнеше, шулай уҡ тармаҡ программаларын һәм проекттарын тормошҡа ашырыу ҡаралды. – Өфөлә беренсел медицина-санитар ярҙамды үҫтереү буйынса Бөтә Рәсәй кәңәшмәһен үткәрергә ҡарар иткәнегеҙ өсөн рәхмәт белдерәм. Шулай уҡ табиптар берләшмәһе, республика халҡы исеменән һаулыҡ һаҡлау өлкәһендәге ярҙамығыҙ өсөн ҙур рәхмәт! Беҙ коронавирус инфекцияһына ҡаршы көрәшеп ҡатмарлы осор үттек. Бөгөн дә тармаҡты үҫтереүгә ҙур ресурстар йүнәлтәбеҙ, – тип белдерҙе Радий Хәбиров. – Бөгөнгө көндә федераль ярҙам менән ике ҙур объект төҙөйбөҙ. Был “Һаулыҡ һаҡлау” милли проекты сиктәрендә төҙөлгән Республика кардиология үҙәгенең яңы корпусы һәм Республика балалар онкологияһы һәм гематологияһы үҙәге. Төбәк етәксеһе ауыл ерендә фельдшер-акушерлыҡ пункттары селтәрен яңыртыу хаҡында ла һөйләне. Әле республика биләмәһендә йәмғеһе 2 меңдән ашыу фельдшер-акушерлыҡ пункты бар һәм дөйөм ил буйынса Башҡортостан лидерҙары иҫәбенә инә. Рәсәйҙең һаулыҡ һаҡлау министры төбәк етәкселегенең медицина өлкәһен үҫтереү буйынса һөҙөмтәле эшен билдәләп үтте. – Был - сирҙе иҫкәртеүгә, уларҙы иртә асыҡлауға һәм дауалауға йүнәлтелгән медицина ярҙамы күрһәтеү системаһын эҙмә-эҙлекле үҙгәртеп ҡороу. Башҡортостанда ғүмер оҙонлоғоноң күтәрелеүе, йөрәк-ҡан тамырҙары һәм онкология ауырыуҙарынан үлем осраҡтарының кәмеүе күҙәтелә, – тине Михаил Мурашко. – Республика күп йүнәлештәр буйынса бай тәжрибә туплаған, шуға күрә Бөтә Рәсәй кәңәшмәһен үткәреү өсөн Өфө ҡалаһын һайлауыбыҙ осраҡлы түгел. Һаулыҡ һаҡлау министрлығы етәксеһе шулай уҡ, Башҡортостанда тупланған уңышлы тәжрибәләрҙе бөтә ил буйынса таратырға кәрәк, тип өҫтәне. Төбәктең һаулыҡ һаҡлау өлкәһен үҫтереүгә индергән ҙур өлөшө өсөн Михаил Мурашко Салауат Юлаев ордены менән бүләкләнде. Фотолар: Башҡортостан Республикаһы Башлығының матбуғат хеҙмәтенән.