Черниковка биҫтәһендәге һаңғырауҙар мәҙәниәт йортона капиталь ремонт 2023 йылда башлана. Башҡортостан Башлығы Радий Хәбиров үткәргән оператив кәңәшмәлә ошо хаҡта һүҙ барҙы. Төбәк етәксеһе республика Мәҙәниәт министрлығына, Төҙөлөш һәм торлаҡ-коммуналь хужалыҡ министрлығына һәм Ғаилә, хеҙмәт һәм халыҡты социаль яҡлау министрлығына учреждениены яңыртыу һәм артабан эш итеү буйынса тәҡдимдәр әҙерләргә ҡушты. – Зинһар өсөн, һаңғырауҙар мәҙәниәт һарайында, Черниковкаға барып ҡайтығыҙ. Улар күптән ремонт һорай, мин вәғәҙә иттем. Быйыл уны яңыртыуға тотонорға кәрәк, – тине Радий Хәбиров. – Беҙҙә һаңғырауҙар федерацияһы бик әүҙем, көслө. Шул уҡ ваҡытта улар бик тыйнаҡ. Әлбиттә, был кешеләргә ярҙам итергә кәрәк. Шулай уҡ ултырышта республиканың спорт министры Руслан Хәбибов 23 июлдән 2 авгусҡа тиклем Өфөлә уҙған сурдлимпиясыларҙың “Беҙ бергә. Спорт” йәйге уйындарына йомғаҡтар яһаны. Ярыштар донъяның 30 иленән, шул иҫәптән Беларусь, Ҡаҙағстан, Бразилия, Франция, Төркиә, Испания, Израиль, Кения, Филиппин, Бахрейна, Иран, Ирак, Вьетнамдан 1,6 меңдән ашыу делегат йыйҙы. Рәсәй йыйылма командаһы составына Башҡортостандан 36 спортсы инде. Бөтәһе атлеттар 21 дисциплинала 233 комплект миҙал уйнатты. Сурдлимпиясыларҙың Йәйге уйындарында Рәсәй йыйылма командаһы еңеүсе булды, ул 351 миҙал яуланы. Башҡортостан спортсылары илдең милли командаһы составында 25 миҙал яуланы, шуларҙың 15-е – алтын, бишәре – көмөш һәм бронза. Бынан тыш, Йәйге сурдлимпия спортсылары йөҙөү, еңел атлетика һәм пуля менән атыу буйынса дүрт яңы донъя рекорды ҡуйҙы. – Уйындар Башҡортостан тарихында иң күләмле халыҡ-ара ярыштарҙың береһенә әүерелде, – тип билдәләне Руслан Хәбибов. – Спортсылар менән бер үк ваҡытта республикаға көйәрмәндәр – 4,5 мең кеше килде. Ярыштарҙы уңышлы уҙғарыу өсөн беҙ эшкә 50 сурдотәржемәсе һәм 300 ирекмән йәлеп иттек. Башҡортостанда ярыштар юғары кимәлдә үтте, ул спортсыларға яҡшы һөҙөмтәләр күрһәтергә мөмкинлек бирҙе, тип билдәләне Радий Хәбиров. Республика Башлығы ойоштороусыларға рәхмәт әйтте һәм уларҙың эшен билдәләргә ҡушты. Фото: Башҡортостан Башлығы сайты.