Башҡортостанда «Урал батыр» эпосын йәш башҡарыусылар конкурсының икенсе көнө үтте

Бөгөн, 17 августа, Бөрйән районының “Ағиҙел” балалар лагеры биләмәһендә йәш сәсәндәрҙең һәм “Урал батыр” эпосын башҡарыусыларҙың 25-се юбилей конкурсының йомғаҡлау этабының икенсе көнө үтте. Алдан яҙғанса, унда бөтә республиканан ғына түгел, Ырымбур һәм Силәбе өлкәләренән дә балалар баҡсалары тәрбиәләнеүселәре, мәктәп уҡыусылары һәм колледж студенттары – бөтәһе 50-нән ашыу кеше ҡатнаша. Иртә таңдан лагерҙың төп сәхнәһе алдындағы майҙансыҡ ҙур байрам концертын хәтерләтте: дәртле музыка яңғыраны, башҡорт милли кейемдәрендә кейенгән балалар үҙҙәренең сығыштарына әҙерләнде. Конкурс шарттары буйынса, уларға “Урал батыр” эпосынан өҙөктө яттан һөйләргә тура килде. Жюри башҡарыу оҫталығын ғына түгел, шулай уҡ ҡатнашыусыларҙың сәхнә костюмдарын һәм төрлө музыка ҡоралдарында уйнау оҫталығын да иҫәпкә ала. Бөрйән районының Иҫке Монасип ауылынан дүртенсе класс уҡыусыһы Исмәғил Йыһануровты алҡыштарға күмделәр. Уның сығышы үҙе бер актер театрына оҡшаған ине. Егет тамашасы алдында йә хикәйәсе, йә башҡорттарҙың тоғро юлдашы булған ат, йә ҡош образында сығыш яһаны. Өҫтәүенә, уларҙың һәр береһенә махсус костюм әҙерләнгән. Эпостан өҙөк уҡыу араһында (ә был 851 юл) ул төрлө музыка ҡоралдарында: ҡурайҙа, ҡумыҙҙа һәм думбырала уйнаны. – Бында килеүемә бик шатмын! Конкурсҡа ныҡлап әҙерләндем, костюм уйлап сығарҙым, репетициялар үткәрҙем... Әлбиттә, борсолдом, әммә тамашасыларҙың алҡыштары һәм жюриҙың хуплауы миңә ышаныс өҫтәне, – тип тәьҫораттары менән уртаҡлашты Исмәғил. Конкурста ҡатнашыусыларҙың барыһы ла етди әҙерләнгән, үҙҙәренең оҫталығын һәм үҙенсәлекле башҡарыуҙарын күрһәтеп, бик шәп сығыш яһаған. Сығанаҡ: https://bv02.info/news/konkursy-stat'i/2023-08-17/v-bashkirii-prohodit-vtoroy-den-konkursa-yunyh-ispolniteley-eposa-ural-batyr-3392314