Ихатағыҙҙа ҡош-ҡортоғоҙ үҫеп еттеме? Бройлерҙарығыҙ һимерҙеме? Ғәҙәттә, ҡайһы берәүҙәр ҡош-ҡорттоң итен тәмле күрһә лә, эске ағзаларын – бауыр-йөрәген эшкә һанамай. Һеҙҙең иғтибарға ҡош-ҡорттоң бауырынан бик тәмле ризыҡтар рецепттары тәҡдим итәбеҙ. Тауыҡ бауырынан кәтлит 450-500 грамм тауыҡ бауырына 1 баш һуған, 1 тырнаҡ һарымһаҡ ҡушып, блендерҙа иҙергә. Ошо массаға 1-2 аш ҡалағы он, 1 сәй ҡалағы паприка, самалап тоҙ, борос һалып болғарға һәм кәтлит кеүек итеп бешерергә. Ҡоймаҡлы ҡабымлыҡ 600 грамм самаһы бауырҙы ит турғас аша үткәрергә, 1 стакан һөт, 2 йомортҡа, 4 аш ҡалағы он ҡушып болғатырға, самалап тоҙ, борос өҫтәргә. Масса йомшағыраҡ булһын тиһәгеҙ, блендер ярҙамында иҙеп алығыҙ. Аҙ ғына майланған табала ике яҡлап ҡоймаҡ кеүек бешерергә. Эслек өсөн: сырҙы, 1 кишерҙе һәм 1 тырнаҡ һарымһаҡты ҡырғыс аша үткәреп, майонез менән бутарға. Эслекте ҡоймаҡҡа һылағас, рулет итеп төрөргә. Бер аҙ һалҡын урында тотҡас, киҫәкләп ҡырҡырға. Паштет 600 грамм ҡош-ҡорт бауырын, 1 баш һуғанды ваҡ итеп турарға, 1 кишерҙе ваҡ ҡырғыс аша үткәрергә һәм ошо массаны 50 грамм самаһы аҡ майҙа 20 минут самаһы быҡтырырға. Самалап тоҙ өҫтәргә. Бер аҙ һыуынғас, 100 грамм йомшарған аҡ май ҡушып, блендерҙа иҙергә. Тәмле һәм туҡлыҡлы паштет әҙер! Салат 500 грамм самаһы тауыҡ бауырын ҡайнаған һыуға һалып, 15 минут бешерергә. Һыуынғас, оҙонса итеп турарға. 2 баш һуғанды ваҡ итеп турап, көнбағыш майында ҡыҙҙырырға һәм һыуытырға ҡуйырға. 3 маринадланған ҡыярҙы ваҡ итеп турарға. Сөм һауытҡа әҙер бауырҙы, һуған, ҡыяр һәм 150 грамм кореяса әҙерләнгән кишер һалып, самалап тоҙ, ҡара борос, майонез өҫтәп, болғайбыҙ. Тоҙ һалмаһаң да була, сөнки ҡыяр менән кореяса кишерҙең тоҙо бар. Фото: ya.ru; lafoy.ru