Радий Хәбиров Рәсәй Дәүләт Думаһы комитетының һәм Башҡортостандың Төҙөүселәр ассоциацияһының күсмә ултырышында сығыш яһаны Кәңәшмәнең темаһы – “Төҙөлөш тармағының көнүҙәк бурыстары: төҙөлөш өлкәһендә ҡануниәтте камиллаштырыу”. Форумда ҡатнашыусылар – Дәүләт Думаһының профилле комитеты депутаттары, тармаҡ министрлыҡтары һәм ведомстволары вәкилдәре, төбәктең эре төҙөүселәре, банк һәм эксперт берләшмәһе белгестәре. Радий Хәбиров билдәләүенсә, төҙөлөш секторы ышаныслы үҫеш күрһәтә. Был күп осраҡта тармаҡҡа ярҙам сараларының федераль реестры ярҙамында мөмкин булды. – Әгәр Рәсәй Хөкүмәте сараларҙы ваҡытында ҡулланмаһа, бындай һөҙөмтәләр килеп сыҡмаҫ ине. Был иҡтисади инструменттар, льготалы ипотека һәм төҙөлөш тармағын дебюрократизациялауға йүнәлтелгән саралар, – тине Радий Хәбиров. Башҡортостан торлаҡ төҙөлөшө темптарын арттырыуҙы дауам итәсәк, тип хәбәр итте Республика Башлығы. Мәҫәлән, 2022 йылда Башҡортостанда рекордлы күләм – 3 миллион квадрат метр индерелде. Был күрһәткес буйынса төбәк илдә лидерҙар иҫәбенә инә. Сығанаҡ: glavarb