3 августа Республика йортонда Башҡортостан Башлығы Радий Хәбиров сираттағы “Инвестиция сәғәте”н үткәрҙе. Унда сәнәғәттә, ауыл хужалығында һәм хеҙмәтләндереү өлкәһендә яңы башланғыстар хупланды. “Элипсмол” компанияһының генераль директоры Александр Захторенко Әлшәй районында майһыҙланған сыр, аҡ май һәм эремсек етештереү буйынса цех төҙөү проектын тәҡдим итте. Компанияның Шишмә районында ла шундай уҡ етештереү майҙансығы бар, унда тәүлегенә 70 тонна самаһы һөт эшкәртелә. Инициативаны тормошҡа ашырыу өсөн кәрәкле документация әҙерләнгән һәм ҡорамалдар менән тәьмин итеүгә һәм монтажлауға килешеүҙәр төҙөлгән. Цехты 2023 йылдың аҙағында асырға ниәтләйҙәр. Киләсәктә инвесторҙар шулай уҡ Үзбәкстан һәм Ҡытай баҙарына сығырға ниәтләй. Ишембай районында "Алға" махсус иҡтисади зонаһы биләмәһендә төҙөлөш материалдары өсөн пластификация компоненттары етештереү комплексын булдырыу проектын "СинтезОйл" компанияһы директоры Алексей Чувычкин тәҡдим итте. Ул билдәләүенсә, хәҙерге шарттарҙа пластификаторҙар баҙары инвестициялар өсөн бик ҡыҙыҡлы. Сеймал сифатында мазут һәм каучук етештереүҙән ҡалдыҡтар ҡулланыла. Ә әҙер продукцияны юл ойошмаларына һәм асфальт ҡатнашмаһы етештереүселәргә бирәләр. Инвестор Башҡортостандың үҫеш Корпорацияһы булышлығында заводты урынлаштырыу өсөн "Алға" махсус иҡтисади зонаһы биләмәһендә уңайлы майҙансыҡ һайланы. Уны төҙөүгә 844 миллион һум аҡса һалырға планлаштыралар, 2025 йыл аҙағына 60 эш урыны булдырыласаҡ. "Альтима Строй" компанияһы директоры Илшат Фәйзуллин Өфө районында төҙөлөп ятҡан объекттарҙы матди-техник ресурстар менән тәьмин итеү өсөн производство базаһы төҙөү проектын тәҡдим итте. Инвестицияларҙың дөйөм күләме – 110 миллион һум. Производство базаһында 100 белгес эшләйәсәк. Объектты 2025 йылдың майына сафҡа индереү күҙаллана. Кушнаренко районында күп функциялы юл буйы комплексын төҙөү пландары тураһында проект менеджеры, "СТК" компанияһы вәкиле Әлфиә Насретдинова һөйләне. Объектты Шәрип–Первушино юлы буйлап урынлаштырыу күҙаллана. Ул автозаправка станцияһы, кафе, ҡунаҡхана, магазин, автомобилдәрҙе техник хеҙмәтләндереү пунктын үҙ эсенә аласаҡ. Инвестицияларҙың дөйөм күләме – 150 миллион һум. Сығанаҡ: glavarb.ru