"Патриот"та десантсылар көс һынашты

Һауа-десант ғәскәрҙәре көнөнә арналған байрам саралары “Патриот” хәрби-патриотик паркында үтте. 12.00 сәғәттә “Геройҙар уҙышы” ҡаршылыҡтар менән экстремаль йүгереү, интерактив күргәҙмә майҙансыҡтары эшләне, күрһәтмә сығыштар булды. Сараға килеүселәр “Первушино” пилотаж төркөмө сығыштары, Башҡортостан Республикаһы Парашют спорты федерацияһының күрһәтмә сығыштарын ҡараны. Быйыл Һауа-десант ғәскәрҙәре көнө үҙенсәлекле шарттарҙа үтте тип әйтергә мөмкин, сөнки беренсе тапҡыр төрлө райондарҙан десантсылар командалары ҡаршылыҡтар арауығын үтеп, үҙҙәренең көсөн һынап ҡараны. Сарала ҡатнашыусылар белдереүҙәренсә, уларға сара оҡшаған. Был хаҡта үҙҙәре лә “Башҡортостан” гәзите журналисына һөйләне. – “Геройҙар уҙышы”на Дүртөйлө районынан команда менән йыйылып килдек. Беҙ инде үткән йыл муниципаль райондар менән ярыштыҡ, әле десантсылар менән көс һынашабыҙ. Бер команданы уҙҙыҡ, һәйбәт йүгерҙек, беҙҙең егеттәр көслө. Арабыҙҙа десантсылар ҙа, муниципаль хеҙмәткәрҙәр ҙә бар. Беҙгә был, дөрөҫөн әйткәндә, ял булды, – тине Дүртөйлө районының Мәскәү ауыл биләмәһе хакимиәте башлығы Динар Хөснөтдинов. Рафиҡ Ахунов Шишмә районынан сараны ҡарарға килгән. – Байрам яҡшы, кәйефтәр һәйбәт, хәрбиҙәрсә. Бөтәһе лә яҡшы ойошторолған, афарин. 1988-1990 йылдарҙа Һауа-десант ғәскәрҙәре сафында хеҙмәт иттем. Армияла хеҙмәт итеү ғорурлыҡ, Тыуған ил алдында бурысыбыҙҙы үтәнек. Тыныс тормошта ла урыныбыҙҙы таптыҡ, мин әле эшҡыуарлыҡ менән шөғөлләнәм. Сара ныҡ оҡшаны. Бөтәһен дә матур итеп эшләгәндәр, иркен, матур, ойоштороу кимәле лә юғары. Таныштарҙы ла, бер полкта хеҙмәт иткән егеттәрҙе осраттыҡ. Ғаиләләре тураһында һорашып белдек, – тине ул. Сара барышы тураһында уның ойошторусылары ла һөйләп үтте. – Бөгөн бөтә ил Һауа-десант ғәскәрҙәре көнөн билдәләй. Башҡортостан Башлығы Радий Хәбировтың ҡушыуы буйынса был көндө Рәсәй Геройы Максим Серафимов исемендәге “Патриот” паркында киң күләмле сара ойошторолдо. Программала командаларҙың “Геройҙар уҙышы” трассаһын үтеү ҡаралған. Улар өсөн концерт программаһы ла ойошторолдо, авиаосош та күрһәтелде. “Патриот” паркында байрам көнө буйына дауам итте. Көслө ямғыр ҙа булды, унан һуң тағы ла ҡояш сыҡты. “Геройҙар уҙышы” һәр ваҡыттағыса кешеләрҙе үҙененең ыңғай йоғонтоһо менән ҡеүәтләндерә. Бөгөн сарала ҡатнашыусылар ҙа башҡа – Һауа-десант ғәскәрҙәрендә хеҙмәт иткән запастағы хәрбиҙәр. Республиканың төрлө райондарынан вәкилдәр килде. Кемдер йәш, кемдер оло йәштә булыуына ҡарамаҫтан, егеттәр инструкторҙар оҙатыуында берҙәм ҡаршылыҡтарҙы үтеп сыҡты, бер-береһенә ярҙам итте. Беҙҙең десантсыларҙың әҙерлеге бик яҡшы, – тине “Геройҙар уҙышы” проекты етәксеһе Эдуард Шафиев. Ғөмүмән, “Патриот” паркына сараны ҡарарға килгән десантсылар ҙа бихисап ине. Улар араһында аҡһап атлап барған хәрбиҙе туҡтатып, уның фекере менән дә ҡыҙыҡһындыҡ. Ул махсус хәрби операциянан ҡайтҡан 28 йәшлек “Черный” ҡушаматлы яугир булып сыҡты. – Байрамға Өфөнән килдем. Мин башҡаса махсус хәрби операцияла ҡатнашмаясаҡмын, сөнки яраланғандан һуң мине артабан хәрби хеҙмәткә яраҡһыҙ тигән ҡарар сығарҙылар. Мин – десантсы, үҙ теләгем менән контракт төҙөп, махсус хәрби операцияға киттем. Һауа-десант ғәскәрҙәре көнө беҙҙең өсөн күңелебеҙгә иң яҡын булған байрам. Был ғәскәрҙәрҙә хеҙмәт итһәң, уны бер ваҡытта ла онотмайһың. Ул күңелдә, йөрәктә мәңгегә ҡала. Бында күп таныштарымды осраттым. Мин был паркта беренсе тапҡыр, бөтәһе лә матур, үҙеңде уңайлы мөхиттә тояһың. Беҙгә хөрмәт белдереп, ошондай сара ойоштороусыларға рәхмәт. Киләсәктә лә уны уҙғарып торһондар, тип теләйбеҙ, – тине яугир. Сарала ҡатнашҡан иптәштәренә рухи ярҙам белдереп килгән десантсылар ҙа күп ине. – Дөрөҫөн генә әйткәндә, сараны ҡыҙыҡлы ойошторғандар, йылдан-йыл сара төрлөләндерелә бара. Бында беренсе тапҡыр килдем. Инде онотоп барған хәрби техника өлгөләрен ҡарау ҙа ҡыҙыҡ булды. Мин Омск ҡалаһында хәрби әҙерлек үттем, һуңынан Тулалағы 106-сы дивизияла хеҙмәт иттем, – ти Денис Ваһапов. Ҡырмыҫҡалы районынан десантсы менән һөйләшеп алдыҡ. – Мин дә Тулалағы 106-сы девизияла хеҙмәт иттем, 51-се парашют-десант полкы. “Патриот” паркындағы сара тураһында ишетеп килдек. Беҙҙең иптәштәр бында йүгерә, уларға рухи ярҙам күрһәттек. Байрам оҡшаны, – тине Азат Ғәйнетдинов. Байрамға десантсылар ғаиләләре, балалары менән килгән. Улар өсөн дә төрлө бәйгеләр, конкурстар ойошторолдо. Ғөмүмән, бында бер кем дә иғтибарҙан ситтә ҡалманы. Айрат Нурмөхәмәтов фотолары.