🌿 (Тропарь)
Светом благодати Божия осиянная, благодати и мужеству соименная, Арсение, игумение богомудрая, Царствия Небесного наследнице, и святых жен и дев сожительнице, не забуди обитель свою и проси нам у Бога мир и богатую милость.
🌿 (Кондак)
Мира греховнаго и яже в нем соблазнов от юности бегала еси, мати блаженная, словесем же Ардалионы богомудрыя внимающи, от силы в силу восходила еси, обитель же свою аще бо и предивно устроивши, под кровом Саровскаго угодника от земных к небесным прешла еси, отонудуже и доднесь не престаеши милости многия точити нам.
🌿 (Величанне)
Ублажаем тя преподобная мати
наша Арсение, и чтем святую память твою: ты бо молиши за нас Христа Бога нашего.
🔔 (Акафист)
(Кондак 1)
Избранней невесте Жениха Небеснаго, родителей благочестивых отрасли благословенней, земли Донския преславному прозябению и обители Усть-Медведицкия богомудрей игумении, Арсении достоблаженней, приидите вернии глас хвалебный вознесем, подвиги ея по достоянию ублажим, песнь сицевую любовию поюще: радуйся, преподобная мати наша Арсение, молитвеннице о душах наших.
(Икос 1)
Ангела безплотнаго и свещу горящу и светящу всем вемы тя, мати наша Арсение,
плоть бо свою от юности духови покорила еси, и всем во мраце жития сущим путь верный еже ко спасению доднесь указуеши, словом живым наставлений своих души наша насыщаеши, тем же приими от нас похвалы сия:
Радуйся, земли Донския преславное прозябение; радуйся, всея Руси пречудное украшение.
Радуйся, чистоту и девство возлюбившая;
радуйся, соблазны юности препобедившая.
Радуйся, в мире надмирно пожившая; радуйся, козни бесовския сокрушившая.
Радуйся, заблуждающих вразумляющая; радуйся, души странных окормляющая.
Радуйся, свеще горящая и светящая;
радуйся, цевнице хвалы Божия неумолкающая.
Радуйся, лика святых дев исполнение; радуйся, нерадиво живущим вразумление.
Радуйся, преподобная мати наша Арсение, молитвеннице о душах наших.
(Кондак 2)
Видящи неотмирность твою и вопрошания, не младенцу, но жене подобающия слышаще, родители твоя, мати Арсение, дивистася, словеса твоя в сердце слагающе, Богови неустанно славословия возсыласта, во дни и в нощи вопиюще к Нему: Аллилуия.
(Икос 2)
Разум Богом просвещен имуще, мати Арсение, трилетна еще сущи, востекла еси ко святителю Антонию и оному в ноги поколонилася еси, честь Самому Христу, на архиереех благодатию почивающему воздала еси. Святитель же рече «Сия великая жена будет», мы же таковому знамению о тебе удивляеми, вопием ти мати тако:
Радуйся, до рождества своего уневещенная; радуйся, от младенства Богом просвещенная.
Радуйся, во смирении воспитанная; радуйся, послушанию наученная.
Радуйся, жития монашеского измлада
искавшая; радуйся, мира и соблазнов его
бегавшая.
Радуйся, в Слове Божием отраду находившая; радуйся, благочестивые мечтания отца своего исполнившая.
Радуйся, укоризны благочестия ради претерпевшая;
Радуйся, незлобие стяжавшая и сохранившая.
Радуйся, благочестию всех научающая;
радуйся, тайные грехи обличающая. Радуйся, преподобная мати наша Арсение,
молитвеннице о душах наших.
(Кондак 3)
Сила Вышняго осени древле в пустыне Египетстей Марию преподобную, сказание же о ея житиии и подвизех единожды услышав, многажды о тех размышляла еси, мати Арсение, Промыслу же Божиему удивляющеся, Содетелю всех вопияла еси: Аллилуия.
(Икос 3)
Имущи помысл твердый и желание крепкое жития монашескаго, мати Арсение, от юности себе к сему пути тесному и трудному, обаче же благодатному и сладкому уготовляла еси, от силы в силу восходяще, сего ради вопием ти:
Радуйся, Троицы Пресвятыя усердная служительнице; радуйся, древних дев и
постниц равная сожительнице.
Радуйся, душу человеческую превыше
всего ценившая; радуйся, о роскоши и богатстве не радевшая.
Радуйся, в чтении житий угодников Божиих поучавшаяся; радуйся, развлечений и суеты мирския отлучавшаяся.
Радуйся, чрез видимую красоту мироздания Невидимаго познавшая; радуйся, Господу хвалу благодарную выну возсылавшая.
Радуйся, Премудростию Божией удивляемая; радуйся, Господом ко спасению направляемая.
Радуйся, неземныя радости преисполненная; радуйся, Духом Святым покровенная.
Радуйся, преподобная мати наша Арсение,
молитвеннице о душах наших.
(Кондак 4)
Буря внутрь помышлений сумнительных воздвижеся в душе твоей, мати Арсение, егда еще ти юней сущи, родитель твой о браце твоем помышлял еси, ты же поведати ему о своем желании иноческаго жития боялася еси, да не огорчиши его. Егда же уразуме' родитель желания и стремления твоя, Богови рече: Аллилуия.
(Икос 4)
Слышав о подвизех духовных и делах милосердия сестер обители Межигорския, ту стопы своя направила еси, мати Арсение; именьми же зело скудною, обаче духовно богатою обрет обитель сию, преподобная, зде вселилася еси, Богови хвалу воздающе. Мы же таковому о тебе промышлению Божию радующеся, вопием ти:
Радуйся, мир и яже в нем отавившая;
радуйся, во обитель Межигорскую волею
пришедшая.
Радуйся, нищетою монастырского жития не устрашенная; радуйся, родителем своим на подвиг сей благословенная.
Радуйся, к простым инокиням любовь имевшая; радуйся, благородство свое в миру оставившая.
Радуйся, чрез скудость земную богатство духовное прозревшая; радуйся, любящая всех, на лица николиже зревшая.
Радуйся, Преображенскую обитель по летех мнозех преобразившая; радуйся, в послушание себе игумении Вирсавии вдавшая.
Радуйся, ради Господа юности своея не по-
щадевшая; радуйся, от силы в силу вос-
ходившая.
Радуйся, преподобная мати наша Арсение, молитвеннице о душах наших.
(Кондак 5)
Боготечная звезда бысть житие твое праведное, мати Арсение, иже многим издалеча добродетелию возсия, всем путь ко спасению указующая. Мы же, прославльшему тя Богу благодарне о тебе вопием: Аллилуия.
(Икос 5)
Выну бысть молитва Иисусова во устех твоих, мати Арсение, молчание бо возлюбив, многолаголания бегала еси, токмо еже на потребу глаголати себе позволяла еси, рукоделие же творя, ум празден не оставляла еси, Псалтирию поучалася еси, зряще же сицевыя труды твоя, вопием ти таковая:
Радуйся, послушания прилежно исполнявшая; радуйся, праздности выну избегавшая.
Радуйся, в писаниих отеческих поучавшаяся; радуйся, тех заветы исполняти потщавшаяся.
Радуйся, лести и лжи непричастная;
радуйся, Христова невесто прекрасная. Радуйся, псалмы Давидовы во уме державшая; радуйся, метания многия еженощно полагавшая.
Радуйся, немощь женскую препобедившая;
радуйся, мужески треволнения и скорби терпевшая.
Радуйся, во Евангелии отраду и успокоение
обретшая; радуйся, евангельских словес исполнением на небеса возшедшая.
Радуйся, преподобная мати наша Арсение, молитвеннице о душах наших.
(Кондак 6)
Проповедует мир весь чудеса и подвиги отцев Киево-Печерских, ихже честным мощем и ты, мати Арсение поклонитися возжелала еси. По мнозех же трудех и скорбех, поветрия морового не устрашившись града Киева достигнув, сердцем и душею Богови песнь воспела еси: Аллилуия.
(Икос 6)
Возсия нам слава чуднаго жития твоего, мати Арсение, верою бо и любовию Господеви неустанно работала еси, душу свою усовершающе, и ко кресту игуменскаго служения уготовляюще, во всем себе воле Божией покорившая, и как от руки Его все скорби и испытания претерпевшая. Тем же ублажающе подвиги твоя, вопием ти сице:
Радуйся, путем суровым и скорбным шествовавшая; радуйся николиже вспять озиравшаяся.
Радуйся, старицу Ардалиону в наставницу себе избравшая; радуйся, тоя словеса выну исполнявшая.
Радуйся, в послушание старице себе волею вдавшая; радуйся, богатство свое духовное
преумножавшая.
Радуйся, скорби от сестер и игумении с
кротостию претерпевшая; радуйся, за тех Бога молити не престававшая.
Радуйся, зависти и ненависти отгнание;
Радуйся, любви Божией и благодати призвание.
Радуйся, нестяжания и кротости наставнице; радуйся, за нас пред Богом ходатаице.
Радуйся, преподобная мати наша Арсение,
молитвеннице о душах наших.
(Кондак 7)
Хотяще непрестанно поучатися словесам и наставлениям Ардалионы богомудрыя, в келию свою сию прияла еси, мати Арсение, а послежде и иныя схимницы, Агафия со Рипсимиею вселишася таможде, любовию же ко Господу соединении, во дни и в нощи вопияли Ему: Аллилуия.
(Икос 7)
Новая милость Божия, и крест новый от Него бысть избрание твое, мати Арсение, на степень игуменскую; благословением же Господним чрез богомудрую Ардалиону укрепляема, на сие новое поприще безстрашно устремилася еси. Мы же таковому о тебе промыслу Божиему радующеся, любовию вопием ти:
Радуйся, во игуменстве подвиги своя усугубившая; радуйся, всем сестрам материю доброю бывшая.
Радуйся, во гресех обличение; радуйся, в добродетелех вспоможение.
Радуйся, новый храм во славу Божию воздвигшая; радуйся, о храмех душ сестер своих неусыпно радевшая.
Радуйся, обители ради не пожалевшая себе; радуйся, яко и камение безгласные доднесь вопиют о тебе.
Радуйся, труженице и молитвеннице смиренная: радуйся, пред Богом за сестер своих ходатаице дерзновенная.
Радуйся, обители Межигорския крепкое утверждение; радуйся, зде живущим в подвизех верное поможение.
Радуйся, преподобная мати наша Арсение, молитвеннице о душах наших.
(Кондак 8)
Странно и предивно есть разумети, како ты, мати Арсение, немощь естества женскаго мужески препобедив, от земных к небесным возшла еси, мнозем же и доднесь путь благий и незаблудный указуеши; в бедности же Христа ради выну живуще, обитель свою предивно украсити и во всем удобрити возмогла еси; тем же прославльшему тя Богови вопием: Аллилуия.
(Икос 8)
Вся и всегда с Богом пребывала еси, мати наша Арсение, твердо веруя, яко и Господь выну с тобою есть, еще бо во юности своей рекла еси: «не боюсь аз геенны, с Господом бо и ад не страшит мя», таковым же словам твоим дивящеся, любовию вопием ти таковая:
Радуйся, токмо Господа возлюбившая; радуйся всем для всех бывшая.
Радуйся, духом нищая; радуйся, гордых обличающая.
Радуйся, о гресех людских плачущая;
радуйся, кающихся утешающая.
Радуйся, агнице Христова кроткая; радуйся, отринувшая низкая, возлюбившая высокая.
Радуйся, алчущих насыщение; радуйся,
жаждущих Слова Жизни напоение.
Радуйся, чудесы верным точащая; радуйся,
с молитвою к тебе прибегающим скоро помогающая.
Радуйся, преподобная мати наша Арсение,
молитвеннице о душах наших.
(Кондак 9)
Вся красная и славная мира сего во уметы вменила еси, мати наша Арсение, весь живот свой на служение Богу и ближним вдала еси без остатка, тем же припадаем ти усердно, да вера, еюже пламенела еси, преподобная, и в нас грешных пребудет, да вопием с тобою Господеви: Аллилуия.
(Икос 9)
Ветия велеречивыя недоумеют и умолкают, зряще подвиги и многия труды твоя, мати наша Арсение, како ты от рождества своего даже до смерти от силы в силу восходила еси на поприще духовнем, житие бо твое незазорное нам грешным обличение есть, сего ради вопием
ти сице:
Радуйся, чистотою и целомудрием просиявшая; радуйся, мудростию своею ближния и дальния удивлявшая.
Радуйся, яко в писаниих твоих поучаемся; радуйся, яко молитвами твоими от грехов свобождаемся.
Радуйся, игумение строгая и милостивая; радуйся, мати любящая и чадолюбивая.
Радуйся, бездно глубокая смирения;
радуйся, горо высокая милосердия.
Радуйся, высото неодолимая преподобия;
радуйся, научительнице кроткая незлобия. Радуйся, Духом Святым вдохновенная; радуйся, во Царствии Небеснем жити удостоенная.
Радуйся, преподобная мати наша Арсение, молитвеннице о душах наших.
(Коңдак 10)
Спасительным путем шествуя, все время живота своего в Богомыслии, трудех и подвизех многих провождала еси, мати Арсение, вопия: «Ты, Господи, един премудр еси и просвещение наше!
Ты, Господи, Сило моя еси! Ты, Господи, един Свет еси!». Тем же и мы убогими усты зовем Ему: Аллилуия.
(Икос 10)
Стеною непреоборимою молитв и благодати своея, юже обильно от Господа стяжала еси, мати Арсение, огради обитель свою Усть-Медведицкую, юже крепко возлюбила еси, еяже ради не щадила живота своего, да собравшеся во спасительней ограде ея и иконе твоей припадающе, тебе тако хвалити будем:
Радуйся, жития отрешеннаго от земных во- жделевшая; радуйся, в скорбех дар Божий прозревшая.
Радуйся, безмолвия истинная наставнице;
радуйся, целомудрия верная хранительнице.
Радуйся, суеты и соблазнов века сего избегавшая; радуйся, путем Христовым незаблудно шествовавшая.
Радуйся, преподобная, Христу уподобившаяся; радуйся, святая, святостию просиявшая.
Радуйся, плоть свою ископанием пещер
смирявшая; радуйся, из глубины оных Господа за весь мир умолявшая.
Радуйся, любве ко Господу преисполненная; радуйся, Духом Святым вдохновенная.
Радуйся, преподобная мати наша Арсение, молитвеннице о душах наших.
(Кондак 11)
Пение сладкое и хвала Господу неусыпная явися чистое и непорочное житие твое, мати Арсение, не сладкозвучною бо свирелию или кимвалом доброгласным Бога прославляла еси, но любовию деятельною к Нему и ближним своим, и всем, во обитель твою притекающим, во дни и нощи вопия Ему: Аллилуия.
(Икос 11)
Тако просветился свет твой пред человеки, мати Арсение, яко вси, видящии добрая дела твоя, прославляли Отца нашего, иже есть на небесех, темже и мы, хвалу воздая Богови, даровавшему нам тя, молитвенницу и ходатаицу нашу, вопием ти:
Радуйся, яко любовь твоя к Богу предел не знаше; радуйся, яко Дух Божий на тебе почиваше.
Радуйся, на земли и под землею Богу
молившаяся; радуйся, от славы и почестей
сокрывшаяся.
Радуйся, Крестный путь Спасителя изобразившая; радуйся, Христа распята проповедавшая.
Радуйся, память смертную выну имевшая; радуйся, к суду страшному уготовлявшаяся.
Радуйся, о воздаянии по смерти помышлявшая; радуйся, со страхом и трепетом молившаяся.
Радуйся, сама себе отрекшаяся; радуйся,
Христу уподобившаяся.
Радуйся, преподобная мати наша Арсение,
молитвеннице о душах наших.
(Кондак 12)
Благодать велию получити восхотев, при конце жития своего, многими скорбями и недугами удрученная, мати Арсение, востекла еси в пустыню Саровскую, да мощем преподобнаго Серафима поклонишися, и Богови, онаго прославльшему честь и хвалу воздаси, юже достигше, возопила еси: Аллилуия.
(Икос 12)
Поюще твое, мати Арсение, равноангельное житие, дивимся и кончине твоей праведней, еяже всещедрый Господь во обители Саровстей тя удостои, тем же и сам преподобный Серафим душу твою от тела возлетевшую срете, сего ради вопием ти:
Радуйся, странницею одинокою
преставившаяся; радуйся, чуждыми людьми на погребение уготовившаяся;
Радуйся, святость за подвиги стяжавшая; радуйся, Бога узревшая.
Радуйся, Царства Небеснаго достигшая; радуйся, тамо успокоение от многих трудов обретшая.
Радуйся, Богообщением наслаждающаяся; радуйся, дщерью Божией нарекшаяся.
Радуйся, награду многу на Небесех получившая; радуйся, в радость Господа своего вшедшая.
Радуйся, лик преподобных исполнившая; радуйся, свещи молитвы своея николиже не угасившая.
Радуйся, преподобная мати наша Арсение, молитвеннице о душах наших.
(Кондак 13)
О, преподобная мати, Богом от рождения избранная Арсение! Приими сие наше малое и убогое моление, пред честною твоею иконою любовию приносимое, и моли прославльшаго тя Господа, да соблюдет от бед Отечество наше и души чтущих святую память твою заступит и помилует да Царствия Небеснаго достигше, вопием Ему: Аллилуия .
(Этот кондак читается трижды, затем 1-й икос: «Ангела безплотнаго…» и 1-й кондак «Избранней невесте…».
🌿 (Молитва первая)
О, святая и достохвальная мати наша Арсение, земли Донския преславное прозябение и родителей благочестивых отрасле благословенная!
Вонми молению нас, недостойных чад и соотчичей твоих, яже пред честною иконою твоею приносим ти ныне! Не возгнушайся гласом нашим, во гресех бо многих и лютых есмы, обаче на милость твою уповаем и за помощию и предстательством дерзаем прибегати к тебе! Умоли, ходатаице наша, Преблагаго Бога, да сохранит Церковь Свою от ересей и расколов, землю нашу Русскую от шатаний и нестроений, войн и междоусобий, народ наш от неверия и лености духовныя.
Вемы, яко много возлюбила еси и много ти от Бога дано ныне, тем же ныне не остави, без твоего молитвенного предстательства нас сирых и в добродетели убогих, и не престай простирати ко Господу многотрудныя руки своя за нас. Се славим праведное житие твое, чтем подвиги твоя, и мольбы своя тебе, яко самей живей сущей с нами приносим. Се собрахомся ныне во обители твоей (пред иконой твоей) и молим тя: да не отыдет благодать Божия от места подвигов твоих, да не угаснет зде (тамо) лампада молений иноческих, да умножится стадо Христово, и да обратятся ко Господу вси, не ведящии Его. Умоли Всеблагаго Бога, да пощадит ны и время для истиннаго покаяния дарует, да грехи и беззакония препобедив, достигнем небесных и вечных обителей, идеже вкупе с тобою и со всеми святыми прославим Имя Отца и Сына и Святаго Духа во веки веков. Аминь.
🌿 Преподобная мати наша Арсение, моли Бога о нас.
🌿 (Молитва вторая)
О святая угоднице Божия, преподобная мати Арсение! Подвигом добрым подвизавшися на земли, восприяла еси на Небесех венец правды, егоже уготовал есть Господь всем любящим Его. Темже взирающе на святый твой образ, радуемся о преславнем скончании жительства твоего и чтем святую память твою. Ты же, предстоя Престолу Божию, приими моления наша и ко Всемилостивому Богу принеси, о еже простити нам, рабам Божьим (имена) всякое прегрешение и помощи нам стати противу кознем диавольским, да избавльшеся от скорбей, болезней, бед и напастей и всякаго зла, благочестно и праведно поживем в нынешнем веце и сподобимся предстательством твоим, аще и недостойни есмы, видети благая на земли живых, славяще Единаго во святых Своих славимаго Бога, Отца и Сына и Святаго Духа, ныне и во веки веков. Аминь.
🌿 Преподобная мати наша Арсение, моли Бога о нас.
