“Таҙа сығанаҡтан” тип аталған XIII Бөтә Рәсәй фестивалендә Республика халыҡ ижады үҙәге Матди булмаған мәҙәни мираҫ бүлегенең “Ҡурай” документаль фильмы беренсе урын яуланы. Режиссеры – күренекле кинорежиссер һәм документалист Радик Килмәмәтов. Кинопроекттың төп маҡсаты – ҡурай башҡорттоң матди булмаған мәҙәни мираҫы икәнде күрһәтеү. Был фильмда республиканың күренекле ҡурайсылары күҙлегенән милли уйын ҡоралына яңы ҡараш сағылдырыла. Ә кинокартинаның төп үҙенсәлектәренең береһе иһә – музыка ҡоралының һаҡланыу технологияһын күрһәтеү. Был ысулды беҙҙең көндәргә тиклем билдәле ҡурайсы Ғата Сөләймәнов еткергән. Бының турала фильмда бөйөк остаздың уҡыусыһы Марат Тулыбаев һөйләй. Еңеүселәрҙе бүләкләү Иркутск өлкәһе Ольхон районында булды. Һуңғы бер нисә ай эсендә республикабыҙҙың кинематография өлкәһендә бик күп еңеүҙәр һәм яңылыҡтар булғайны. Документаль “Ҡурай” фильмы ла халҡыбыҙҙың кино тарихына тағы ла бер алтын өлгө булып ятты. Фотолар: "Башинформ".