Башҡортостанда туризм һәм хеҙмәтләндереү өлкәһендә кластер булдырыласаҡ

Килешеүгә Башҡортостандың Мәғариф һәм фән министрлығы, Башҡортостандың эшҡыуарлыҡ һәм туризм министрлығы, Өфө сәнәғәт технологиялары колледжы һәм Өфө «Восход» икмәк бешереү берекмәһе араһында ҡул ҡуйылды. Башҡортостан — «Профессионалитет» федераль проектының әүҙем ҡатнашыусыһы. Рәсәй Мәғариф министрлығы республиканың 14 ғаризаһын хупланы. Әлеге ваҡытта беҙҙең төбәк Рәсәй Федерацияһында хупланған ғаризалар һаны буйынса 1-се урынды биләй (Ырымбур өлкәһе менән бер рәттән). Һәр ғариза ҙур федераль фонд булып тора — 60-тан алып 100 миллион һумға тиклем аҡса бүлеү ҡаралған. «Туризм өлкәһе — республиканың иң йылдам үҫешеүсе йүнәлештәренең береһе. Быйыл республикала туризм өлкәһенә булышлыҡ итеү һәм уны үҫтереү өсөн бүленгән бюджет аҡсаһының дөйөм суммаһы 1,2 миллиард һум тәшкил итә, тип белдерҙе Башҡортостандың эшҡыуарлыҡ һәм туризм министры вазифаһын башҡарыусы Илнур Тактаев. Әйткәндәй, 2023 йылдың тәүге биш айында республикала туристар ағымы 30 процентҡа артҡан һәм яҡынса 862 мең кеше тәшкил иткән. Сифатлы туристик хеҙмәттәр күрһәтергә һәләтле квалификациялы кадрҙар булмаһа, туризмды үҫтереү мөмкин түгел. Республика ҡунаҡтары төбәктә үҙҙәрен уңайлы тойорға тейеш. Шуға күрә иҡтисадтың клиенттарға йүнәлтелгән секторы булараҡ хеҙмәтләндереү өлкәһендә, ҡунаҡсыллыҡ өлкәһендә профессиональ белгестәрҙе тәьмин итеү мөһим. Республиканың Эшҡыуарлыҡ һәм туризм министрлығы менән Өфө тармаҡ технологиялары колледжы араһында хеҙмәттәшлек тураһында килешеүгә ҡул ҡуйыу күрһәтелгән хеҙмәттәрҙең сифатын яҡшыртырға һәм туристар йәлеп итеүсәнлеген үҫтереү шарты булдырырға мөмкинлек бирәсәк. Үҙ сиратында туристик компанияларҙа практика үтеү өсөн базаларҙы киңәйтеү, тармаҡ белгестәрен белем биреү процесына йәлеп итеү туризм өлкәһендә белем биреүҙең сифатын яҡшыртырға мөмкинлек бирәсәк. «Восход» Өфө икмәк бешереү берекмәһенең генераль директоры Вячеслав Оточин әйтеүенсә, бөгөн төрлө йүнәлештәге предприятиеларға йәш, юғары квалификациялы белгестәрҙе йәлеп итеү кәрәклеге бар. Ойошма был проектта ҡатнашыуы менән риза. Башҡортостан Башлығы Радий Хәбиров һәм Башҡортостан Хөкүмәте ярҙамы менән колледждар матди-техник базаны нығыта, ятаҡтарҙы ремонтлай һәм яңы оҫтаханалар булдыра. Башҡортостан «Мәғариф» милли проектының «Йәш профессионалдар» федераль проектын тормошҡа ашырыу сиктәрендә булдырылған донъя стандарттары буйынса оҫтаханалар һаны буйынса алдынғы урынды биләй. Фото: "Башинформ" мәғлүмәт агентлығынан алынды.