Яҡты донъяларҙа йәшәүе рәхәт булһа ла, арыным мин, ҡыҙым...

Башҡортостандың һәм Татарстандың халыҡ йырсыһы Хәниә Фәрхиҙең арабыҙҙан китеүенә 27 июлдә алты йыл тулды. Ошо көндәрҙә уның һеңлеһе Фирүзә Ибәтуллина артистың әсәһен Үрге Тәтешле ауылындағы һәйкәле янына алып барыуҙары тураһында социаль селтәрҙә уртаҡлашты. “Инәйҙе һиңә алып килдем бөгөн, йөрәккәйем. Һинең таш һыныңа таянып: “Ҡыҙым, ҡыҙым, йөрәккәйем, рәхмәт һиңә. Әйт әле, ниңә мин бик оҙаҡ йәшәйем икән? Яҡты донъяларҙа йәшәүе рәхәт булһа ла, арыным мин, ҡыҙым”, – тине ул. Арыным тигәндәре миңә ауыр ишетелде. Инәй, ғәзизем, һин янымда, һин йәшәгәндә мин бит әле сабый, ҡыҙ бала. Йәшәйек әле, инәй, йәшәйек”, – тип яҙған ул. Фото: vk.com