Ошо көндәрҙә Миәкә районының Әбеш ауылында бик матур никах туйы уҙғарылған. Ошо ауылдың һылыуы Фаягөл Хажиева менән Әлшәй районы Балғажы ауылы егете Рөстәм Шәфиев үҙҙәренең тәүге ғаилә байрамын башҡорт милли йолалары буйынса ойошторған. Фаягөлгә бәйләнешкә сығып, бындай матур байрамдың ойошторолоу тарихы тураһында һөйләүҙе үтендем. – Идея минеке ине. Рөстәм менән алдан, никахтағы кейемебеҙ бер-береһенә килешһен, тип һөйләшеп йөрөй инек. "Стандарт" никах күлдәге кейге килмәне, бөтәһе лә бер төрлө һымаҡ.Шунан һуң үҙемде башҡорт милли кейемендәге образда күҙ алдына килтерә башланым, Рөстәм дә ҡаршы булманы. Әсәйем: "Икебеҙ бер төрлө уйлағанбыҙ икән, мин дә һеҙгә шуны әйтәм тип йөрөгәйнем", – тип ныҡ шатланды. Унан инде никахты тулыһынса башҡортса яһарға булдыҡ, һәм туғандарҙың, ҡунаҡтарҙың башҡорт кейемендә килеүен үтендек. Халҡыбыҙ йолаларын үткәреү, йортобоҙҙа тирмә ҡуйыу, мәсеткә ҡыҙҙы яулыҡ менән ҡаплап алып барыу әсәйемдең идеяһы булды. Әйткәндәй, ауылыбыҙ мәсетендә муллабыҙ беренсе тапҡыр никах үткәрҙе. Мәсет яңы, быға тиклем ауылда ул юҡ ине. Никахты мәсеттә үтҡәрергә атайым тәҡдим итте. Беҙҙең никах туйының нисек ойошторолоуы бөтәһенә лә оҡшаны. Атай-әсәйем Фәнзил Миңлеғол улы менән Асия Шәкүр ҡыҙына, ҡайны-ҡәйнәм Барис Рифҡәт улы менән Рәшиҙә Әнүәр ҡыҙына ниәтебеҙҙе ихлас хуплағандары өсөн рәхмәт әйтәбеҙ! – тип бәйән итте Фаягөл. Милли мәҙәниәтебеҙ менән ҡыҙыҡһынған, халҡыбыҙ йолаларына йөҙ борған йәштәр булыуы ниндәй ҡыуаныслы! Фаягөл менән Рөстәмдән өлгө алған йәштәребеҙ тағы ла артыр, тип ышанғы килә. Фотолар – Фаягөл Хажиеванан.