Быйыл Башҡортостанда бөйөр синдромлы геморрагик биҙгәк менән сирләү дүрт тапҡырға кәмене. Был хаҡта Ҡулланыусыларҙың хоҡуҡтарын яҡлау һәм кеше именлеге өлкәһендә күҙәтеү буйынса (Роспотребнадзор) федераль хеҙмәттең республика идаралығы етәксеһе Анна Казак Башҡортостан Башлығы Радий Хәбиров үткәргән аҙналыҡ оператив кәңәшмәлә хәбәр итте. Мәҫәлән, “Роспотребнадзор”ҙың тәҡдиме буйына төбәк Хөкүмәте бөйөр синдромлы геморрагик биҙгәк сирен тәбиғи ҡуҙғатыусы 45 мең гектар майҙанды эшкәртеүгә өҫтәмә финанслау ебәрҙе. Был сысҡан биҙгәге менән сирләүҙе бер нисә тапҡыр кәметергә мөмкинлек бирҙе. Бынан тыш, республиканың Һаулыҡ һаҡлау министрлығы менән берлектә "Роспотребнадзор"ҙың төбәк идаралығы ҡыҙылсаға ҡаршы иммунизацияны дауам итә. Анна Казак хәбәр итеүенсә, быйыл марттан илдә ҡыҙылса буйынса эпидемиологик хәлдең ҡатмарлашыуы күҙәтелә – 4 274 ауырыу осрағы. Республикала 65 кеше ауырып киткән, шуларҙың 46-һы – балалар. "Роспотребнадзор" идаралығы етәксеһе ауырыуға ҡаршы вакцинация яһатырға кәрәклеге тураһында хәбәр итте. Республиканың профилле башҡарма власть органдары менән бергә "Роспотребнадзор" белгестәре яңы уҡыу йылына әҙерлекте дауам итә. 1 сентябрь алдынан Башҡортостандың 1 756 мәктәбендә профилактик саралар ойошторорға һәм үткәрергә кәрәк. Улар иҫәбендә – биналарҙы дезинфекциялау, аҙыҡ-түлек блоктары хеҙмәткәрҙәрен инфекцияларҙы ҡуҙғытыусылар барлығына тикшереү. Дөйөм алғанда, республикала 2023 йылдың беренсе ярты йыллығы йомғаҡтары буйынса эпидемиологик хәл имен тип баһалана. Фото: talantikam.ru