Бөгөн Башҡортостан Башлығы Радий Хәбиров уҙғарған оператив кәңәшмәлә республика дәүләт идаралығының һанлы үҫеш министры Геннадий Разумикин төбәк биләмәһендә “Һанлы тигеҙһеҙлекте бөтөрөү 2.0” федераль проектын ғәмәлгә ашырыу хаҡында һөйләне. Һүҙ бында 100-ҙән 500-гә тиклем кеше йәшәгән тораҡ пункттарҙа кәрәҙле элемтә сигналы һәм мобиль интернет менән ҡаплаясаҡ база станцияларын урынлаштырыу хаҡында бара. Башҡортостанда дөйөм исемлеккә 1 600 самаһы ауыл ингән. Был Рәсәй Федерацияһы субъекттары араһында иң күбе. 2023 йылдың июнендә 125 тораҡ пунктта тәүге база станциялары асыла. Элемтә системалары GSM һәм 4G форматында эшләйәсәк. Иң күп элемтә системалары Белорет, Ҡалтасы, Шаран, Асҡын, Ҡариҙел райондарының төпкөл ауылдарында монтажланған. Йыл аҙағына тиклем төбәктә тағы 117 элемтә нөктәһен тоташтырыу күҙаллана. Әле проект-эҙләнеү һәм төҙөлөш-монтажлау эштәре алып барыла. Был программа Урал аръяғы муниципалитеттарында, ҡатмарлы рельефлы райондарҙа айырыуса ҙур ихтыяж менән файҙалана. Радий Хәбиров республика Һанлы үҫеш министрлығы коллективына “Һанлы тигеҙһеҙлекте бөтөрөү 2.0” проектын ғәмәлгә ашырған өсөн рәхмәт белдерҙе. Республика Башлығы проектты артабан үтәүҙе тикшереү өсөн был мәсьәләне яҡын аралағы “Төҙөлөш сәғәте”нә индерергә ҡушты. – Һеҙ иҫ киткес эш башҡарҙығыҙ. Проект республикала мобиль элемтә сифатын яҡшыртырға мөмкинлек бирәсәк, – тине Радий Хәбиров. – Республика Һанлы үҫеш министрлығының ҙур командаһына рәхмәт. Федераль министрлыҡтар һәм беҙҙең партнёрҙар – элемтә операторҙары ярҙам итә. Торама пункттарҙы тоташтырыу сираты туранан-тура һайлауҙар юлы менән билдәләнә. Заманса элемтә системаһын ҡуйҙырыу өсөн “Дәүләт хеҙмәттәре” порталы йәки Рәсәй почтаһы аша хат аша тауыш бирергә мөмкин. 2022 йылда, мәҫәлән, федераль проектҡа ауылдарҙы индереү өсөн Башҡортостандан 82 мең самаһы кеше тауыш биргән. Был күрһәткес буйынса республика Рәсәйҙең алдынғы төбәктәре иҫәбенә инде. Ә 17 июлдән 2024 йылда база станцияларын урынлаштырыу планына инәсәк торама пункттар өсөн тауыш биреү башланды. “Дәүләт хеҙмәттәре” порталында 7,9 мең кеше тауыш биргән дә инде. Фото: viorin.com