"Транспорт сәғәте"ндә ниҙәр ҡаралды?

Башҡортостан Хөкүмәтенән хәбәр итеүҙәренсә, 31 июлдә Башҡортостан Башлығы Радий Хәбиров үткәргән "Транспорт сәғәте"ндә төбәктең юл селтәрен тәртиптә тотоу һәм үҫтереү мәсьәләләре ҡаралды. Иң мөһим темаларҙың береһе - 2024 - 2026 йылдарға ремонтлау планына инәсәк юлдар исемлеген булдырыу. Иҫегеҙгә төшөрәбеҙ, ремонт программаһы 2023 йылда республика Башлығы тәҡдиме буйынса дүрт миллиард һумлыҡ бюджет менән эшләй башланы. Киләһе йылда ла ошондай уҡ күләмдә аҡса планлаштырылған. Башҡортостандың транспорт һәм юл хужалығы министры Александр Клебанов төбәк, муниципаль-ара һәм урындағы әһәмиәттәге трассаларҙың яҡынса исемлеген тәҡдим итте. Уны Республикаға идара итеү үҙәге һәм муниципалитет хакимиәттәре менән берлектә әҙерләгәндәр. Исемлеккә ярашлы, Башҡортостанда 351,4 саҡрым автомобиль юлын тәртипкә килтереү планлаштырыла. Шул уҡ ваҡытта иң ҙур проекттар 2026 йылға тиклем бер нисә этапта башҡарыласаҡ. - Һеҙҙең ҡушыуығыҙ буйынса, беҙ шулай уҡ Башҡортостандың төньяҡ-көнсығыш райондарындағы проблемалы участкалар исемлеген һораныҡ, - тип өҫтәне Александр Клебанов. - Яҡын арала урындағы хакимиәттәр менән берлектә төҙөкләндереү өсөн өҫтәмә 400 миллион һум йүнәлтергә тейешле трассалар исемлеген билдәләйәсәкбеҙ. Артабан "Транспорт сәғәте"ндә ҡатнашыусылар республика юлдарында ауырлыҡ контроле системаһын үҫтереүҙе ҡараны. Юл хәрәкәтен ойоштороу үҙәге етәксеһе Мансаф Низаҡаев хәбәр итеүенсә, төбәктә юл япмаһын һаҡлауҙы тәьмин итеү өсөн автоматлаштырылған 13 комплекс эшләй. Улар йөктәрҙең, габарит параметрҙарының һәм юғары тиҙлекле транспорт режимының артыуын теркәй. 2023 йылдың 1 октябренә тиклем Баймаҡ, Благовещен, Ишембай, Нуриман, Хәйбулла, Өфө райондары юлдарында тағы ете ауырлыҡ контроле комплексы ҡуйыласаҡ. Шулай итеп, контроллек итеү пункттары һаны буйынса Башҡортостан илдең алдынғы биш төбәге иҫәбенә инәсәк. - Киләһе этап 2024 йылда төп трассаларҙы ауырлыҡ контроле системалары менән йыһазландырыу өсөн Өфө агломерацияһын өйрәнеүгә тотонорға кәрәк, - тине Радий Хәбиров. Кәңәшмәнең көн тәртибендә тағы ла бер мәсьәлә - Башҡортостандың баш ҡалаһының 450 йыллығына әҙерлек сиктәрендә 2023-2024 йылдарҙа Өфөнөң урам селтәрен ремонтлау барышы ҡаралды. 2024 йылда дөйөм оҙонлоғо 30,2 саҡрым тәшкил иткән 12 участканы тәртипкә килтереү планлаштырыла. Ҡала хакимиәте, биҫтәләрҙең перспективалы үҫешен һәм планлаштырылған трафигын иҫәпкә алып, финал исемлеген әҙерләй. "Транспорт сәғәте"ндә Өфөнөң Зәки Вәлиди урамы һәм Салауат Юлаев проспекты киҫелешендәге транспорт сиселешен төҙөкләндереү мәсьәләһе лә ситтә ҡалманы. Был эште үткән аҙнала баш ҡаланың Киров районы коммуналь хеҙмәттәре башлаған. Өфө ҡалаһы хакимиәте башлығы Ратмир Мәүлиев ҡаланың Октябрь районындағы "Ҡашҡаҙан" мәҙәниәт һәм ял паркын хеҙмәтләндереү барышы менән дә таныштырҙы. Үткән аҙнала күлдә һыу кимәлен күтәреү өсөн өҫтәмә һыу үткәргес һалынған. Ә парк биләмәһен 1 августан "Горзеленхоз" муниципаль бюджет учреждениеһы хеҙмәтләндерәсәк. Фото: Башҡортостан Башлығы сайты.