Башҡортостан Хөкүмәтенән хәбәр итеүҙәренсә, бөгөн, 29 июлдә Донбасҡа эш сәфәре барышында Башҡортостан Башлығы Радий Хәбиров Миңлеғәле Шайморатов исемендәге ирекле батальон яугирҙәре менән осрашты. Төбәк етәксеһе команда һәм подразделениеның шәхси составы менән аралашты, яугирҙәрҙең үтенесен тыңланы һәм яугирҙәргә дәүләт наградалары - Батырлыҡ ордены, «Батырлыҡ өсөн» миҙалы, шулай уҡ генерал Шайморатов ордендары һәм миҙалдары тапшырҙы. - Һеҙҙе күреүемә бик шатмын. Һеҙ - республикабыҙҙа тәүге ирекле батальон һәм хәҙер инде бер йылдан ашыу һуғышаһығыҙ. Беҙ һеҙҙең өсөн бик борсолабыҙ, тиҙерәк һеҙҙең өйгә ҡайтып етеүегеҙ өсөн доға ҡылабыҙ. Туғандарығыҙ һәм яҡындарығыҙҙан, бөтә Башҡортостандан ҡайнар сәләмдәр һәм хөрмәт һүҙҙәре алып килдем, - тине Радий Хәбиров. - Һеҙ Ватан һағында торған күп йәштәр өсөн өлгө булдығыҙ. Бөгөн Һамар өлкәһендә «Башҡортостан» ирекмәндәр полкы әҙерлек һыҙығын үтә. Тиҙҙән ул алғы һыҙыҡҡа юлланасаҡ Республика яугирҙәргә һәм уларҙың ғаиләләренә тейешле ярҙам күрһәтеүен дауам итәсәк, тип һыҙыҡ өҫтөнә алды төбәк етәксеһе. - Йортоғоҙҙа барыһы ла яҡшы булыуы мөһим. Үтенес бар икән, уларҙы тыңларға һәм ярҙам итергә әҙербеҙ, - тип билдәләне Радий Хәбиров. - Хеҙмәтегеҙ мәсьәләләрендә лә булышлыҡ итербеҙ - медицина ярҙамы, экипировка, көнкүреште төҙөкләндереү һәм ситтә ҡалмаҫ. Һеҙ - беҙҙең өсөн иң ҡәҙерле кешеләр. Батальон яугирҙәре үҙ сиратында Радий Хәбировҡа, республиканың идара итеү командаһына һәм бөтә яҡташтарына махсус хәрби операция территорияһындағы подразделениеларға ярҙам күрһәткәндәре өсөн рәхмәт белдерҙе. Башҡортостан Башлығы шулай уҡ Донбасс биләмәһендә командировкала торған Республика стоматология поликлиникаһы табиптары менән аралашты. Июль башынан алып күсмә стоматология модулендә белгестәр бригадаһы хәрбиҙәргә – махсус хәрби операцияла ҡатнашыусыларға медицина ярҙамы күрһәтә. Радий Хәбиров дарыуҙар, башҡа материалдар менән ҡыҙыҡһынды, медицина хеҙмәткәрҙәренә ябай булмаған хеҙмәттәре һәм яугирҙәргә ярҙам иткәндәре өсөн рәхмәт белдерҙе. Ирекмәндәр менән осрашыуҙан һуң төбәк етәксеһе эш сәфәренең маҡсаттары тураһында һөйләне. - Батальон бер нисә ай буйына Артемовск районында һуғыша, унда оборонаны батырҙарса тота. Яралылар бар, юғалтыуҙар бар. Һәм беҙ яҡташтарыбыҙҙың янына килеп, уларға ҡул ҡыҫып һәм дәүләт наградаларын тапшырмайынса булдыра алманыҡ, - тип йомғаҡ яһаны Радий Хәбиров. - Бөгөн беҙ бығаса булмағанса бүләкләү үткәрҙек. 100-ҙән ашыу кеше орден һәм миҙал алды. Улар ошо наградаларға лайыҡ. Улар - беҙҙең геройҙар, беҙ улар менән бик ғорурланабыҙ. Фото: Республика Башлығы сайтынан