Ҡалаларҙы үҫтереү һәм цифрлы үҙгәртеү буйынса IV “Аҡыллы ҡала – Аҡыллы ил” халыҡ-ара форум сиктәрендә илдең йәштәр берләшмәләре вәкиле булған үҫмерҙәрҙең бизнес-идеяларын тикшереү өсөн майҙансыҡтар бүленгән. Буласаҡ эшҡыуарҙар менән диалогҡа Рәсәй бизнесының төрлө өлкәләре вәкилдәрен саҡырҙылар. Игорь, Саша һәм Андрей - эшҡыуарлыҡ берләшмәһендә тап яңы кешеләр. Асылда яңыраҡ ҡына студенттар ине, йәғни әле ментор статусына инмәгәндәр. Форумдың йәштәр аудиторияһы менән улар ышаныслы һөйләшеү үткәрҙе. Бизнесҡа нисек инеү тураһында хәтирәләр уларҙа әле иҫкермәгән. Тәүге уңыштары, уңышһыҙлыҡтар әсеһен тормош тәжрибәһе итеп алыу, иҡтисадта үҙ урыныңды булдырыу хыялын тормошҡа ашырыу юлдарын уҡыусылар менән бүлештеләр. Улар ҡатнашыусыларҙы үҙ эшен башларға рухландырҙы, һәм был юлда һикәлтәләр тураһында ла иҫкәртте. Игорь, 32 йәш, дүрт юғары белем дипломы бар: – 14 йәшемдә сайттар булдыра башланым. Студент әсәйемә бушлай, уның коллегаларына - аҡсаға. Мин ул саҡта был бизнес икәнен белмәй инем. Әммә оҡшай ине. Үҙ йәшеңде әүҙем проекттар өсөн мөмкин тиклем файҙаланырға кәңәш итәм (ирекмәнлек, йәмәғәт эшмәкәрлеге). Әйткәндәй, уҡыу һәм эшҡыуарлыҡты бергә алып барып була. Белемде һанға һуҡмаған кешеләр бар. Йәнәһе, тәжрибә генә етә. Аҡса артынан ҡыумағыҙ! Иң тәүҙә төплө белем кәрәк. Андрей, 19 йәш: - 11 йәшемдә мин балалар менән ҡаланың ваҡ магазиндарына уйынсыҡтар, магниттар, значоктар ташый башланым. Һуңынан Воронеж ҡалаһының дөйөм туҡланыу өсөн йәшелсә етештереү компанияһында эшләнем. Тышҡы реклама эшләргә тура килде. 17 йәшемдә мин 15 кешенән торған төркөмгә етәкселек иттем. Белемемде ҡулланыу өлкәләрен эҙләргә өйрәнәм. Хәҙер башлыса ритейл өсөн эшләйбеҙ. Әйткәндәй, мин Европаға уҡырға барырға уйлағайным, әммә, асыҡланыуынса, Рәсәйҙә яҡшы бизнес алып барыу өсөн күп структуралар, аҡыллы остаздар бар. Ғөмүмән, үҙ илебеҙҙә ихтыяж барлығын аңлау йөрәгемде йылыта. Кәрәкле булыу яҡшы! Александр, 30 йәш: - Нимә менән генә шөғөлләнмәнем! Сараларҙа йырлап, балалар байрамдары ойошторҙом. Ашау, бер аҙ гонорар өсөн. Аңлы эшҡыуарлыҡ клининг компанияһы ойошторолғандан һуң килде. Бер йылда уға 124 хеҙмәткәр инде. Килемдең 10 процентын хәйриә проекттарына йүнәлтәбеҙ. Төшөнкөлөккә бирелмәгеҙ! 14 йәштә үҙеңде бизнеста һынап ҡарау – иң яҡшы ваҡыт! “Аҡыллы ҡала – Аҡыллы ил” форумының матбуғат үҙәге фотоһы. Сығанаҡ: resbash.ru